Të tjera detaje janë zbardhur në lidhje me arrestimin e efektivit, Florenc Bicerri, ish-komandos Kujtim Çeliku dhe Adrian Qiricit.
Raportohet se tre personat janë arrestuar në një parking në Stamboll, ku i janë gjetur mbi 32 kg lëndë narkotike.
Çantën që e dispononte Florenc Bicerri ka kaluar me të në Rinas më 5 tetor duke udhëtuar drejt Stambollit bashkë me Kujtim Çelikun.
Grupi hetimor ka dyshime për persona të tjerë të përfshirë dhe po hetohet se si çanta me kanabis kaloi nga Rinasi.
Për këtë punonjës policie, Drejtori i Përgjithshëm i Policisë së Shtetit, Muhamet Rrumbullaku ka urdhëruar përjashtimin e menjëhershëm dhe përgjithmonë, nga Policia e Shtetit.
Grupi i dedikuar hetimor, në bashkëpunim me Agjencinë e Mbikëqyrjes Policore dhe me homologët turq, po vijon punën për zbardhjen e rrethaneve të rastit, evidentimin dhe kapjen e personave të tjerë të implikuar në këtë rast të trafikimit të lëndëve narkotike.
