Bisedimet e fundit mes delegacioneve të Ukrainës dhe Rusisë në Stamboll përfunduan pa ndonjë marrëveshje konkrete, teksa Moska refuzoi një propozim të Kievit për një takim të drejtpërdrejtë mes presidentit ukrainas Volodymyr Zelensky dhe presidentit rus Vladimir Putin para fundit të gushtit.
Takimi zgjati vetëm 40 minuta dhe u zhvillua në një klimë të tensionuar, pak ditë pasi presidenti amerikan Donald Trump i dha Moskës një afat 50-ditor për të arritur një marrëveshje paqeje, përndryshe do të përballej me sanksione të reja të ashpra.
Zëdhënësi i Kremlinit, Dmitry Peskov, e minimizoi rëndësinë e takimit, duke theksuar se qëndrimet mes dy palëve janë ende “diametralisht të kundërta” dhe se nuk priten zhvillime të mëdha. Peskov konfirmoi se delegacioni rus, i kryesuar nga Vladimir Medinsky, nuk kishte ndryshuar nga raundet e mëparshme. Ndërsa Ukrainën e përfaqësoi Rustem Umerov, ish-ministri i Mbrojtjes.
Kievi kishte shpresuar që një takim ballë për ballë mes Zelenskyt dhe Putinit mund të ndihmonte në ndaljen e luftës, por Kremlini refuzoi kategorikisht.
Ndërkohë, Rusia vazhdon ofensivën në lindje të Ukrainës, ndërsa sulmet me dronë dhe raketa kanë goditur qytete të ndryshme. Shifrat e viktimave ruse kanë arritur nivele alarmante, me mbi 1 milion të vrarë apo të plagosur që nga fillimi i luftës, sipas një raporti të fundit të Ministrisë britanike të Mbrojtjes dhe Qendrës për Studime Strategjike dhe Ndërkombëtare në SHBA.
SHBA ka njoftuar një marrëveshje të re për furnizim me armë në Kiev përmes aleatëve evropianë, ndërsa Bashkimi Evropian ka paralajmëruar një paketë të re sanksionesh ndaj Rusisë dhe institucioneve financiare që ndihmojnë Moskën të shmangë masat ekzistuese.
Pavarësisht këtyre presioneve dhe humbjeve të mëdha njerëzore, Moska vijon të refuzojë çdo kompromis dhe qëndron e palëkundur në qëllimet e saj ndaj Ukrainës.
