Vetëm pak orë pasi Vladimir Putin nga një konferencë për mediat nga Astana tha se një përplasje e drejtpërdrejtë midis NATO-s dhe trupave ruse do të çonte në një ‘katastrofë globale’, aleanca është kundërpërgjigjur duke njoftuar nisjen e stërvitjeve ushtarake me armët bërthamore që posedojnë vendet e BE.
Sipas zëdhënëses Oana Lungescu stërvitja “Steadfast Noon” do të ndihmojë për të siguruar që parandalimi bërthamor i NATO-s të mbetet i sigurt dhe efektiv. Në këtë stërvitje do të përfshihen 14 vende dhe deri në 60 avionë dhe fluturimet do të kryhen mbi Belgjikë, Detin e Veriut dhe Britani.
Aty gjithashtu do të përfshihen avionët luftarakë më të avancuar në treg dhe bombarduesit amerikanë B-52 me rreze të gjatë që do të fluturojnë nga baza ajrore Minot në Dakotën e Veriut.
Por, aleanca pretendon se stërvitjet rutinë nuk janë të lidhura me ngjarjet aktuale në arenën botërore.
Në faqen e saj të internetit, NATO tha se stërvitja, e cila do të zgjasë deri më 30 tetor është një aktivitet trajnimi rutinë, i përsëritur dhe shtoi se nuk do të përdoren armë të vërteta.
Por në krahun tjetër, Putin tha sot se mobilizimi i fundit ushtarak që ai urdhëroi është drejt fundit dhe se ai nuk ka plane për rekrutime të mëtejshme pasi kjo të ketë përfunduar.
Ai përsëriti gjithashtu qëndrimin e Kremlinit se Rusia ishte e gatshme të zhvillonte bisedime, megjithëse tha se ato do të kërkonin ndërmjetësim ndërkombëtar nëse Ukraina ishte e gatshme të merrte pjesë.
