Gjimnazi më i njohur i qytetit të Beratit, që mban emrin e firmëtarit të deklaratës së Pavarësisë, “Babë Dudë Karbunara” ka rënë pre e një grabitje mbrëmjen e sotme.
Mësohet se 20 IPode që shërbejnë për zhvillimin e orëve të mësimit elektronik në këtë shkollë janë grabitur nga hajdutët që kanë thyer xhamin e dritares së katit të dytë të ndërtesës për të hyrë brenda saj.
IPode-t e vjedhur ndodheshin brenda një kasaforte, të cilët hajdutët e kanë marrë dhe janë larguar me vrap, por në momentet e fundit janë pikasur nga roja e shkollës, i cili ka njoftuar policinë.
Gjimnazi “Babë Dudë Karbunara” ishte duke u boshatisur prej disa ditësh pasi do të shembet për tu rindërtuar nga e para. Shumica e materialeve të shkollës janë hequr, ndërkohë që kasaforta do të largohej ditën e nesërme me vinç, për arsye të peshës së saj.
Policia e Beratit ka shoqëruar rojën e shkollës për të dhënë deklaratën e tij, ndërsa në vendngjarje pritet mbërritja e ekspertëve kriminalistikë që do kryejnë këqyrjen e saj.
