Një aksident ka ndodhur mbrëmjen e kësaj te Enjte në aksin rrugor Elbasan-Librazhd, në afërsi të Urës së Lizës.
Drejtuesi i një makine të tipit “Benz” ka humbur kontrollin e mjetit dhe është përplasur me një makinë të pastrimit të plehrave.
Sipas bluve, si pasojë e përplasjes ka mbetur i plagosur një punonjës i pastrimit dhe pasagjeri i “Benz”-it.
“Në aksin rrugor Elbasan-Librazhd, në fshatin Mengel, shtetasi M. Z., 70 vjeç, banues në Elbasan, duke drejtuar mjetin tip “Benz “, ka humbur kontrollin mbi drejtimin e tij dhe ka goditur mjetin tip “Reno” ( mjet për pastrimin e plehrave) me drejtues shtetasin V.P., 56 vjeç, banues në Elbasan. Si pasojë e përplasjes, është dëmtuar një punonjës që ndodhej në mjetin e pastrimit, shtetasi A.K., rreth 50 vjeç, banues në Elbasan si dhe pasagjeri i mjetit tip “Benz”, shtetasi M.Xh., 65 vjeç, banues në Elbasan, të cilët ndodhen në spital nën kujdesin e mjekëve”, njofton policia.
Grupi hetimor në vendngjarje vazhdon hetimet për zbardhjen e plotë të rrethanave të aksidentit.
