Gjykata Europiane e Të Drejtave të Njeriut nuk ka pranuar kërkesën e ish-guvernatorit të Bankës së Shqipërisë, Ardian Fullani.
Në vendimin përfundimtar të gjykatës thuhet se: “Gjykata konstatoi se z. Fullani nuk kishte përdorur të gjitha mjetet juridike të brendshme në dispozicion të tij, para se t’i drejtohej Gjykatës së Strasburgut”.
Gjatë argumentimit në vendim thuhet se Fullani duhet të kishte ezauruar të gjitha organet e drejtësisë në vend më pas t’i drejtohej Gjykatës Europiane Të Të Drejtave të Njeriut.
“Fullani nuk kishte paraqitur një ankesë në Gjykatën Kushtetuese e cila që nga ndryshimet në Kushtetutën e vitit 2016, kishte qenë në parim, një mjet efektiv në lidhje me pretendimet e ndonjërit shkelje e të drejtave të mbrojtura nga Konventa Evropiane për të Drejtat e Njeriut dhe Protokollet e saj që është ratifikuar nga Shqipëria“, thuhet në vendim.
GJEDNJ vendosi të mospranojë kërkesën e Fullanit që pretendonte se duhet të rikthehej në detyrë pasi sipas tij i ishin shkelur të drejtat. GJEDNJ argumenton se kërkesa është e papranueshme.
Ardian Fullani kishte çuar çështjen në këtë gjykatë ndërkombëtare, pasi kundërshtonte shkarkimin e tij nga detyra. Padia e tij u regjistrua në këtë gjykatë më datën 22 nëntor të vitit 2019 dhe më pas Strasburgu solli pyetjet për Shqipërinë nëse janë respektuar procedurat ligjore.
Pas shkarkimit Fullani fitoi në gjykatë edhe dëmshpërblim për ‘shkarkimi të padrejte nga posti i guvernatorit’. Por pavarësisht këtij fakti, Fullani pretendoi se për rastin e tij është shkelur neni 8 i Konventës, për shkak të dështimit të gjykatave vendase për ta rikthyer atë në detyrë dhe mos dhënien e dëmshpërblimit për dëmet e shkaktuara në reputacionin dhe nderin e tij.
Kujtomë se Fullani u shkarkua në 2014 pasi u akuzua për shpërdorim detyre, pas zhdukjes së 713 milionë lekëve. Më pas ai u arrestua dhe gjykata e la në arrest shtëpie. Në dhjetor të 2015, u shpall i pafajshëm nga Apeli.
Vendimi i Gjykatës në Strasburg për Ardian Fullanin:
