Policia e Korçës ka shoqëruar 15 persona për ngjarjen e ndodhur mëngjesin e sotëm, ku punonjësit të një pike karburanti, shtetasit Marsel Buçi iu dogj automjeti, në atë që dyshohet të jetë zjarrvënie e qëllimshme.
Ndër personat që i janë drejtuar Komisariatit është edhe “gangsterja” e Bilishtit, Deizi Arapi e njohur tashmë në media për serinë e djegies së makinave të saj dhe përplasjet me policinë e banorët e qytetit.
27-vjeçarja që reklamon jetë luksi në Instagram është e akuzuar kryesore nga familja Buçi për djegien e automjetit të tyre, pikërisht sepse dy javë më parë kur iu dogj makina e saj tip “Benz”, e reja akuzoi djalin si autor i zjarrvënies.
Lidhur më ngjarjen ka folur edhe vetë Marsel Buçi, i cili njëjtë si i ati akuzon Deizi Arapin si përgjegjëse.
“Nuk kam konflikte me persona të tjerë. Motrat më kanë akuzuar për djegien e makinës së tyre, por unë nuk kam gisht në këtë ngjarje. Makina mu dogj në orën që është djegur edhe makina e vajzave. Çfarë më bënë të mendoj që mesazhi për mua është i qartë”, tha Buçi për mediat.
Ndërkohë, policia ka sekuestruar kamerat e sigurisë të shtëpisë së Marsel Buçit, por edhe të shtëpive pranë vendit të ngjarjes për të identifikuar autorin.