Një grup me 5 skuadra dhe rivalë si Polonia dhe Republika Çeke që mund të shtojnë shpresat për një kualifikim, ishin dy “dhuratat” që goglat në shortin e hedhur në Gjermani për kualifikueset e Euro2024 i sollën Shqipërisë.
Kombëtarja kuqezi pozicionohet në Grupin E, ku skuadrat më pak favorite do të jenë dy kundërshtarët e tjerë, Ishujt Faroe dhe Moldavia.
E teksa entuziazmi nuk mungon dhe shpresat janë të mëdha për kualifikim duke parë se çfarë “peshkoi” kombëtarja, UEFA ka përcaktuar edhe kalendarin e ndeshjeve për të gjitha grupet.
Shqipëria do të nisë eliminatoret në transfertë me duelin ndaj Polonisë që do të luhet më datën 27 mars 2023.
Pas tre muajsh kuqezinjtë do të rikthehen në fushë, pasi më 17 qershor do të presin në shtëpi Moldavinë dhe tre ditë më pas do të sfidojnë në transfertë Ishujt Faroe, dy sfida ku do të kërkohen me ngulm 6 pikë.
Ndërkohë, në shtator Shqipëria do të ketë dy përballjet që mund të vendosin fatin e kualifikuesve, pasi sfidon rivalët direktë.
Më 7 shtator, kombëtarja fluturon drejt Pragës për t’u përballur me Republikën Çeke, ndërsa më 10 shtator pret Poloninë në shtëpi.
Më 12 tetor, përfaqësuesja shqiptare do të presë Republikën Çeke në një tjetër duel delikat, për të mbyllur eliminatoret në muajin nëntor me dy ndeshjet, Moldavi-Shqipëri (17 nëntor) dhe Shqipëri – Ishujt Faroe (20 nëntor).
KALENDARI I SHQIPËRISË PËR ELIMINATORET EURO2024:
27/03/2023 Poloni – Shqipëri
17/06/2023 Shqipëri – Moldavi
20/06/2023 Ishujt Faroe – Shqipëri
07/09/2023 Republika Çeke – Shqipëri
10/09/2023 Shqipëri – Poloni
12/10/2023 Shqipëri – Republika Çeke
17/11/2023 Moldavi – Shqipëri
20/11/2023 Shqipëri – Ishujt Faroe
