Është finalizuar një tjetër aksion policor ndërkombëtar mes uniformave blu të Shqipërisë dhe homologëve të tyre turk.
Falë bashkëpunimit të policive mes dy vendeve, bëhet me dije se është goditur një tjetër grup që ushtronte veprimtarinë kriminale në fushën e narkotikëve në Manisa të Turqisë. Policia njofton se është arrestuar një shtetas turk, ndërsa 2 shqiptarë janë shpallur në kërkim pasi janë implikuar në këtë grup kriminal.
Gjithashtu janë sekuestruar 3 armë zjarri pistoleta, municion luftarak, 8.6 kg kanabis, 9 pako me drogë sintetike dhe 211 bimë narkotike të kultivuara.
“Operacioni policor i koduar “Përtej kufijve”, falë bashkëpunimit të Policisë shqiptare me Policinë turke. Policia e Shtetit siguroi informacion se në Manisa të Turqisë, disa persona ushtronin veprimtari kriminale në fushën e kultivimit, prodhimit dhe shpërndarjes së lëndëve narkotike. Informacioni i siguruar nga Policia shqiptare i është përcjellë menjëherë homologëve turq, të cilët organizuan dhe finalizuan operacionin policor të koduar “Përtej kufijve”.
Është arrestuar 1 shtetas turk, ndërsa 3 të tjerë janë proceduar penalisht. Gjithashtu janë shpallur në kërkim 2 shtetas shqiptarë dhe 1 shtetas turk, si të implikuar në këtë veprimtari kriminale.
Në kuadër të operacionit, u bë e mundur që në Manisa të Turqisë, të evidentohej vendi ku ishin kultivuar bimët narkotike. Gjatë operacionit, Policia turke sekuestroi 3 armë zjarri pistoleta, municion luftarak, 8.6 kg marijuanë, 9 pako me drogë sintetike dhe 211 bimë narkotike të kultivuara”, njofton Policia e Shtetit.
