Është shoqëruar në Drejtorinë e Tiranës mbrëmjen e sotme Indrit Dokle, ish-anëtar i bandës së Durrësit.
Policia njofton se ai është marrë në pyetje pasi shoqëronte një person me precedentë penale. Ndërkaq zbulohet se personi që po e shoqëronte ishte Fatjon Murataj.
Murataj ishte shpallur në kërkim pasi në bazë të një procedimi penal të këtij viti, ka rezultuar se është bashkëpunëtor (posedues i armëve) me shtetasin K. Gj., i cili është arrestuar në kuadër të operacionit “Ruger”.
“Në kuadër të kontrolleve “blic” për kapjen e personave në kërkim, bazuar dhe në infomacionet e marra në rrugë operative për një shtetas në kërkim që qarkullonte me automjet, nga shërbimet e Seksionit për Hetimin e Krimeve të Rënda ndaj Jetës dhe Forcës së Posaçme “Shqiponja”, të Drejtorisë Vendore të Policisë Tiranë, është organizuar puna dhe është kapur shtetasi në kërkim F. M., 32 vjeç, banues në Tiranë, i cili shoqërohej bashkë me dy shtetas të tjerë, E. D., 39 vjeç, dhe G. R., 39 vjeç. Në vijim të veprimeve u bë ndalimi i shtetasit F. M., i cili ishte shpallur në kërkim pasi në bazë të një procedimi penal të këtij viti, ka rezultuar se është bashkëpunëtor (posedues i armëve) me shtetasin K. Gj., i cili është arrestuar në kuadër të operacionit “Ruger”, të zhvilluar me datë 12.07.2022”, thuhet në njoftimin e policisë.
Ndërsa për Doklen dhe G. R., të cilët udhëtonin me 32-vjeçarin, po vijojnë veprimet hetimore .
Kujtojmë se Dokle ka qenë më parë i dënuar me burgim të përjetshëm për një seri vrasjesh të kryera në kuadër të bandës së Durrësit.
Ai doli nga qelia pasi avokati paraqiti arsyetimin se klienti i tij “kishte kryer 25 vite burgim dhe ishte sjellë mirë”, ndërsa shtoi se Dokle nuk ishte në gjendje të mirë shëndetësore.
