Deputetja e Partisë Demokratike, Grida Duma ka pranuar se Lulzim Basha si kryetar i selisë blu për 9 vite, ka rezultuar në sondazhe me më pak pikë sesa vetë forca politike që ai drejtonte, sa herë që kishte zgjedhje.
Në SyriTV, Duma tha se Basha u vërtetua që në 2015 që nuk fitonte dot dhe madje rrëfeu një shprehje që në një mbledhje të 2019 lideri i PD, Sali Berisha i kishte thënë parardhësit të tij.
Gjithashtu, Duma e quan Bashën të përkëdhelur, pasi siç thekson ajo besohej nga të gjithë se ai një ditë do të bëhej politikan fitues.
“Në 2017-ën, strategjistët vazhdonin dhe thonin se vetëm kryetari duhet t’i ketë projektorët. Diku në 2019-ën doli sërish një sondazh tjetër. Unë mbaj mend që Berisha vjen në mbledhje dhe thotë një fjali me vlerë, thotë: “Lider nuk të bën statuti, lider të bën nëse ti merr një fitore”. Në atë kohë, Basha shfaqej nën partinë si vlerë. Ne kemi qenë të ditur me këto variabla. Do thoni se ka qenë e pamundur të ndërrosh liderin në atë kohë, por s’mund të bësh sikur nuk ka ndodhur asgjë. Sikur 5% të rekuperonim nëpërmjet grupit, nëpërmjet një tjetër trendi, nëpërmjet një tjetër alternative, ose duke vënë liderin historik në qarkun më të madh. Duhej bërë diçka. Ne nuk mund të vazhdonim me përsëritje. U vërtetua në 2015, në 2017 dhe përsëri. Në këto kushte ata nuk e dhanë variablin se mendonin që një njeri, sidomos lideri, që ka 30 vite që e ngritur që e ka mbajtur me thonj, që ka ditur të bëjë aleanca, që ka ditur të bëjë bashkë fermerin me intelektualin, ky i di që këto janë ABC e politikës, pse nuk po vepron”, rrëfeu deputetja e PD.
Duma më tej shtoi se ka pasur gjithmonë dyshime se Basha ishte i shitur dhe pjesë e pazareve me rivalin e tij politik.
“Dyshimi, ishte apo s’ishte i shitur, ishte në pazar kryetari formal apo nuk ishte në pazar. Ky dyshim qëndroi sepse kishte disa gjëra që logjikisht nuk përgjigjeshin. Pse nuk propozuam emra për Reformën në Drejtësi. Pse nuk morëm pjesë në Reformën Territoriale. Jam kam thënë atëherë që ka rënë miti i rotacionit. Kur ra 8 vjetëshi, të luash me mitet, do të thotë që ti duhet të bësh namin e strategjisë që ti besojnë njerëzit se në mandatin e tretë do ja dalësh kur nuk ia dole në rotacionin historik. Një nga gjërat që demokratët kanë ndjerë, është që ne do luftojmë 100 për qind por për një njeri që mendojmë 100 për qind që s’na shet”, tha Duma.
