Ish-komisari i policisë, Dritan Zagani ka folur rreth aksionit të Forcave RENEA në Shijak, për zhdukjen e Ervis Martinajt.
I ftuar në emisionin “Shqipëria Live”, ai ka deklaruar se policia është e vonuar, lidhur me këtë çështje, teksa shtoi më tej se Ervis Martinaj komandonte shtetin me shumat marramendëse. Sipas Zaganit, “mbretin e kazinove” e ka marrë në qafë egoja e tij.
“Përderisa kemi këtë shtet, policia është pasqyrë e këtij shteti. Përderisa kemi një ministër që thotë krimi sjell zhvillim, çfarë presim nga policia.
Policia jo thjesht është e vonuar, por mund të përdoret edhe për propagandë për të kamufluar një tjetër gjë.
Pse Martinaj ishte gjithmonë në komandë të lëvizjes së policisë? Komandonte shtetin me shumat marramendëse. Atë e ka marrë në qafë egoja e tij. Sa më thellë policia të shkojë, aq më shumë kupton se në çfarë llumi ka rënë.
Po të zbardhet e gjithë ngjarja, gjysma e drejtorëve të policisë përfundojnë në burg, gjithë shqiptarët janë të sigurt, por mua m’u dha mundësia ta them publikisht”, tha Zagani.
