Kryeministri Edi Rama ka folur për mediat nga Praga, ku po zhvillohet mbledhja e parë e Komunitetit Politik Evropian, një nismë e re kjo, që lindi si ide e Presidentit francez Emmanuel Macron për të bashkuar të gjithë vendet e kontinentit europian në një tryezë diskutimesh ku zërat do të jenë të barabartë për nga rëndësia.
Në kryeqytetin çek kanë zbarkuar më shumë se 40 liderë nga e gjithë Evropa në takimin përurues, dhe Rama në fjalën e tij vlerësoi faktin se Shqipëria ka marrë një tjetër zë në mënyrën si ulet në tryezë për të diskutuar mbi sfidat që kontinenti i vjetër vuan.
“Në një format me më shumë se 20 vende ne jemi ndarë në tryeza të rrumbullakëta dhe jemi fokusuar në propozimet tona. Që nga kriza energjetike tek inflacioni i Putinit dhe patjetër tek forcat e rublave në gjirin e shoqërive tona. Ky është një proces, frika ka qenë një forcë shumë vendimtare në gjithë historinë e përpjekjeve për të ndërtuar një Komunitet Politik Evropian, ashtu siç ka qenë një forcë penguese dhe për vetë BE. Në një situatë si kjo, Evropa është në një pikë ku për ta krijuar të ardhmen duhet ta parashikojë”, tha Rama.
Shefi i qeverisë sqaroi se tanimë edhe vendet e Ballkanit do të jenë pjesë e bisedimeve të Bashkimit Evropian për përballimin e krizës energjetike, apo mënyrën sesi do të luftohet Rusia me sanksione dhe zhvlerësim të rublës.
Rama tha se ministrat e Energjisë së Ballkanit do jenë pjesë e takimit të BE që do të mbahet së shpejti në Pragë për krizën energjetike.
“Me kërkesën time drejtuar kryetares së Komisionit është pranuar që të thirren ministrat e energjisë së rajonit në Pragë për të trajtuar çështjen e krizës energjetike si një problem evropian. Në tryezën e rrumbullakët ku kam qenë bashkë me kryeministrin e Holandës fokusi kryesor ka qenë kriza energjetike dhe si vendet tona, duke nisur nga vendet që kanë hapur negociatat për anëtarësim, do duhet të ndihmohen drejtpërdrejte. Unë kam insistuar që duhet të përfshihen të 6 vendet, pavarësisht nëse i kanë hapur apo jo negociatat. Komuniteti evropian është një komunitete vendesh që bashkohen për çështje që janë gjithnjë e më shumë të përbashkëta. Nuk ndahen dot në pjesë kriza e klimës, kriza energjetike, demokratike. Jemi në një epokë të re rreziku, kemi dalë nga epoka e sigurt. Kjo epokë e rrezikut i ka mbledhur të gjithë dhe i ka nxitur të afrohen sa më shumë për shkak të inflacionit të luftës. Shqipëria ka një peshë tjetër dhe një zë tjetër”, shtoi kreu i qeverisë.
