Deputeti demokratë Enkelejd Alibeaj dhe Gazmend Bardhi shkuan këtë të Mërkurë pasdite në Presidencë, me ftesë së kreut të shtetit Bajram Begaj, si përfaqësues në Partinë Demokratike. Qëllimi i vizitës janë konsultimet që ka nisur Presidenti për datën e zgjedhjeve lokale.
Të Hënën, ishte kryeministri dhe kreu i PS, Edi Rama që shkoi në zyrën e Begajt, ndërsa të Martën shkuan përfaqësuesit e partive të vogla.
Presidenca ka bërë me dije se ka ftuar edhe Oerd Bylykbashin.
Ndërkohë, të Enjten në mëngjes është radha e kryetarit të grupit parlamentar socialist Taulant Balla.
Sipas kodit zgjedhor, data e zgjedhjeve mund të mbahen në periudhën nga 15 prilli deri më 15 maj. Një nga datat më lakuara ka qenë e diela e 14 majit 2023.
