Nga Boldnews.al
Në kulmin e diskutimit mbi ndërtimet pa leje të kullave dhe pallateve në Tiranë, i vetmi person që nuk po preket është drejtuesi i Inspektoriatit Ndërtimor Urbanistik Vendor, Mariglen Qato, që mban detyrën e Kryeinspektorit. Në fakt, edhe pse nuk është një gradë hierarkike, ai duhet të cilësohet “Drejtues Madhor” i ndërtimeve pa leje në kryeqytet, me pseudonimin “kati shtesë”.
Janë me mijëra metra katrorë ndërtime pa leje në mes të kryeqytetit të ngritura nga oligarkia e ndërtimit të cilën kryeinspektori dhe vartësit e tij nuk deshën t’i shohin, por nga ana tjetër janë “skifterë” të avllive pa leje, apo vigjilentë në procedimin e “kriminelëve” që ndërtojnë kotecët e pulave.
Arsyet se përse ende mban këtë detyrë “i forti me të varfërit” dhe “eunuku” i oligarkëve, nuk do të shpjegohen kurrë, pasi para një viti ai doli edhe më i fuqishëm kur sfidoi Prokurorinë e Tiranës e cila kërkoi për të dhe dy inspektorë arrest me burg, por gjykata i la të lirë. Si për të treguar se mbrohet nga “topehekuri” në krye të bashkisë, ai as nuk denjoi të kapërcente derën e prokurorisë së kryeqytetit që të merrej në pyetje, duke dërguar raport se ishte i sëmurë dhe po në të njëjtën ditë shfaqej lokaleve të bllokut.
Po cilat janë detyrat e INUV-it të drejtuar nga Mariglen Qato? “Merr masa për evidentimin e rasteve të ndërtimeve të kryera në kundërshtim me ligjin, ndërtimeve të kryera pa lejen e ndertimit nga organet përkatese, ose në shkelje të lejes së ndërtimit; Trajton dhe iu jep zgjidhje kërkesave të qytetareve në lidhje me ndërtimet e kryera në kundërshtim me ligjin; Inspekton në mënyre periodike kantierët e ndërtimit, kontrollon dhe kujdeset që ndërtimet të kryhen në përputhje me lejet përkatese të ndërtimit; Informon Kryetarin e Bashkisë mbi gjendjen në terren dhe masat e marra nga inspektoriati në zbatim të ligjit”.
Të gjitha këto kompetenca janë në duart e kryeinspektorit Qato, i cili nëse drejtësia do ishte funksionale dhe e barabartë për të gjithë, sot do të zinte shtratin e një qelie dhe personi më i afërt do i bëhej avokati mbrojtës. Një nga pikat që e bën Qaton dyfish fajtor, por trefish të mbrojtur nga bota e errët e politikës dhe e oligarkisë së ndërtimit është pjesa ku thuhet se: “Inspekton në mënyre periodike kantierët e ndërtimit, kontrollon dhe kujdeset që ndërtimet të kryhen në përputhje me lejet përkatese të ndërtimit”.
Detyra e Qatos dhe e inspektorëve të INUV ishte që të kontrollonte kullat dhe pallatet e Tiranës qëe janë në ndërtim nëse i janë përbajtur lejes së ndërtimit apo janë në shkelje të saj. Me siguri Qato “punëmbaruari” i Lali Erit i ka vizutuar këto kulla dhe pallate, por asnjë shkelje nuk ka raportuar. Çudia është që vetë Rama kurrë nuk e ka përmendur bashkinë dhe instituesionet në varësi të saj, paçka se e ka të qartë se e keqja po i vjen nga çiraku i dikurshëm që sot duket se e kërcënon me parimin bazë: Oligarkët nuk i gjeta unë, ato i solle ti…
Në pjesën propagandistike të qeverisë u tha se katër drejtues të policisë së komisariatit 1 në Tiranë janë pezulluar nga detyra për çështjen e ndërtimeve pa leje. Po kryeinspektori i Lali Erit përse nuk preket? Ligji është i qartë, ata jo vetëm nuk morën masat për të ndaluar ndërtimet pa leje të pallateve dhe kullave, por as nuk i kanë kostatuar.
Megjithatë Veliaj nuk po e ndjek në këtë lojë të kreut të qeverisë që përbetohet çdo ditë që nuk ka marrë para nga oligarkët e ndërtimit. As për propagandë Lali Eri nuk ka ndërmend të lëvizë nga detyra “symbyllurit e shekullit”, kreun e INUV Mariglen Qato.
