Pengmarrja në autostradën Durrës-Tiranë/ Shpallet në kërkim “Rrumi i Shijakut” |

Aleksander Laho alias Pëllumb Muharremi, i njohur edhe si Rumi, është shpallur në kërkim policor për veprën penale “Heqja e paligjshme e lirisë”.

Ai akuzohet për pengmarrjen e një prej vëllezërve Beqiraj në autostradën Tiranë-Durrës disa ditë më parë.

Në një njoftim për mediat këtë të Martë, kreu i Policisë së Durrësit njoftoi shpalljen në kërkim të Rumit në kuadër të aksionit të koduar “Porositësit”, që solli zbulimin e një grupi që vepronte me pagesë.

Rumi dhe dy persona të tjerë u shpallën në kërkim për veprën penale “Heqja e paligjshme e lirisë”, ndërsa një i tretë është arrestuar për të njëjtën akuzë.

“Në kuadër të veprimeve të thelluara të kryera në vijimësi, si dhe atyre të kryera gjatë dy ditëve të fundit, nisur edhe nga konflikti mes 2 vëllezërve me disa persona të tjerë, u bë e mundur zbardhja e disa ngjarjeve kriminale, si dhe qëllimi i konflikit të ndodhur më datë 02.10.2022, në autostradën Durrës-Tiranë, në vendin e quajtur “Koxhas”, ku disa persona me automjete kanë goditur motomjetin e dy vellezërve Gentian Beqiri dhe Ilir Beqiri dhe më pas kanë marrë me vete, njërin prej tyre, për disa minuta. Në sajë të veprimeve të shpejta, reagimit dhe presionit policor, personat që kishin marrë në automjet shtetasin Ilir Beqiri, në pamundësi për të dalë me automjet nga perimetri i rrethimit të Policisë, e kanë lënë në rrugë shtetasin Ilir Beqiri, kanë braktisur automjetet dhe kanë mundur të largohen në këmbë. Nga tërësia e veprimeve hetimore u bë dokumentimi i plotë i kësaj ngjarjeje dhe identifikimi i autorëve të saj. Është vënë në pranga njëri prej autorëve dhe janë shpallur në kërkim 3 të tjerë. Gjithashtu u sekuestruan mjetet e përdorura në këtë ngjarje. Në automjetin me të cilin është marrë peng shtetasi Ilir Beqiri janë gjetur dhe fiksuar prova shkencore“, njoftoi policia.