Vëllezërit Indrit dhe Gentian Beqiraj operonin prej dy vitesh si vrasës me pagesë në zonën e Durrësit dhe Tiranës duke marrë disa porosi për ekzekutimin e të paktën katër personave.
Sipas hetimeve, porosia e parë ishte marrë në Tiranë ku Kasandër Noga, sipas policisë, kishte kërkuar vrasjen e Edmond Crrojt dhe dy nipërve të tij në zonën e “Don Boskos” në kryeqytet. Për shkak të ngatërrimit të objektivit, ata nuk u vranë, por gabimisht u ekzekutua Erjon Çela, më datë 4 janar të vitit të shkuar pikërisht në zonën e “Don Boskos”.
Vrasja e dytë, për të cilën kishin marrë porosi vëllezërit Beqiraj kishte të bënte me ekzekutimin e Arben Mërkurit në Sukth. Mërkuri dyshohej nga policia si vrasës me pagesë dhe u vra pesë muaj më parë në biznesin e tij në zonën e Sukthit.
Policia thekson se nuk ka ende informacion për vrasjen e Mërkurit dhe nuk dihet nëse e kanë ekzekutuar vëllezërit Beqiraj apo dikush tjetër, megjithatë këta të fundit kishin marrë 3500 euro paradhënie dhe kishin marrë një shtëpi me qira pranë vendit ku jetonte Mërkuri, sipas bluve të Durrësit.
Policia thekson se porosinë për vrasjen e Mërkurit e kishte dhënë Kevin Zeneli, për llogari të Kasandër Nogës, i cili aktualisht është i arrestuar në Belgjikë.
Mes 14 të arrestuarve të këtij grupi janë edhe një punonjës policie dhe edhe një ushtarak, të cilët gjenin armët dhe lëndët shpërthyese.
