Departamenti i Thesarit Amerikan ka sanksionuar kryeministrin e Federatës së Bosnjë e Hercegovinës, Fadil Novaliç, për një aferë të ngjashme me “patronazhistët” në Shqipëri.
Sipas Thesarit Amerikan, në cilësinë e si kryeministër, Novaliç “keqpërdori të dhënat e pensionistëve për të mirën e partisë së tij politike dhe në kundërshtim me ligjin boshnjak”.
Sipas autoriteteve amerikane: Në javën para zgjedhjeve të 2018-ës, Novaliç përdori të dhënat e pensionistëve që kishte marrë përmes pozicionit të tij zyrtar. Kjo, për të dërguar letra duke renditur arritjet e tij dhe duke premtuar rritje të pensioneve në një vend ku çështja e pensioneve ka një rëndësi të madhe politike.
“Ky veprim shkel ligjin e BiH dhe pasqyron një model më të gjerë, të raportuar publikisht të përdorimit të pozicionit të tij të ndikimit politik për përfitime personale ose partiake, duke minuar proceset ose institucionet demokratike në BiH”, thekson më tej njoftimi.
Novaliç u emërua nga autoritetet amerikane si “përgjegjës ose bashkëpunëtor ose përfshirje direkt ose indirekte në veprime ose politika që minojnë proceset ose institucionet demokratike në Ballkanin Perëndimor”.
Një skemë e ngjashme u përdorur edhe në vendin tonë edhe nga Partia Socialiste. Në media u ekspozua sesi para zgjedhjeve parlamentare të 25 prillit të dhënat personale të 910 mijë qytetarëve të Tiranës, që dyshohet se u morën nga databaza shtetërore, po shfrytëzoheshin për qëllime elektorale nga Partia Socialiste.
Lidhur me rastin u nis një hetim nga Prokuroria e Posaçme, e cila megjithatë vendosi të “shfrynte” çështjen.
SPAK e regjistroi hetimin si “korrupsion në zgjedhje”, ndërsa pas 7 muaj hetime arriti në përfundimin se në këtë rast nuk jemi përpara një korrupsioni zgjedhor, por thjesht në ndërhyrje të paautorizuar të të dhënave kompjuterike.
Me ketë argument Prokuroria e Posaçme ia përcolli dosjen për kompetencë Prokurorisë së Tiranës.
Opozita e cilësoi një skandal përdorimin e të dhënave personale të qytetarëve për qëllime elektorale. Nga ana tjetër, mazhoranca e mbrojti me zell. Kryeministri Edi Rama deklaroi se ndihej “krenarë” për patronazhistët. Erion Veliaj, kryebashkiaku socialist i Tiranës, i cilësoi “motori i Partisë Socialiste”.
