Në konferencën e sotme për mediat ministrja e Financave, Delina Ibrahimaj ka bërë një bilanc të ekonomisë, duke deklaruar se të ardhurat në buxhetin e shtetit janë rritur me 15.9% në krahasim me një vit më parë.
“Të ardhurat janë 15.9% më shumë në krahasim me një vit më parë. Edhe muaji shtator ka qëndruar në të njëjtën linjë. Në shpenzimet qeveritare kemi pasur një ecuri të shpenzimeve 1.4% më të lartë se viti i kaluar. Eksportet e mallrave dhe shërbimeve janë rritur me 9% ndërsa importet me 17.6%. Pritshmëritë për pjesën e mbetur të vitit janë për rritje ekonomike pozitive po ashtu edhe në vitin 2023”, tha Ibrahimaj.
Por, ajo çka të gjithë ekspertët i frikësohen dhe konstatojnë është se kjo rritje “artificiale” e fitimeve të buxhetit të shtetit, është në krahun tjetër burim varfërie për shqiptarët, xhepat e të cilëve janë goditur rëndë nga inflacioni në rritje.
Teksa indeksimi i pagave mungon prej vitesh edhe vetë ministrja e Ramës u detyrua që të pranojë se është rritja e çmimeve (kryesisht të shportës së ushqimeve bazë dhe karburantit) faktori kryesor që ka çuar në këtë shtim të ardhurash.
E shpjeguar thjesht, rritja e të ardhurave me thuajse 16% që Ibrahimaj pretendon të jetë shifra reale, janë para më shumë të shpenzuara nga shqiptarët e goditur rëndë nga kriza ekonomike, që kanë blerë me 2 apo 3 herë më shumë qumështin, bukën, vezët apo miellin.
“Të ardhurat janë rritur me 15.9% në krahasim me një vit më parë. Kjo është rritur ngushtësisht me çmimet”, ishte pohimi i ministres për faktin e pakontestueshëm.
Ndër të tjera, ministrja u pyet edhe për ligjin e amnistisë fiskale, propozim personal i kryeministrit Edi Rama që fsheh brenda tij hije të mëdha misteri, për mënyrën sesi do të menaxhohet fluksi i parave të pista që rrezikon të hyjë në ekonominë shqiptare për t’u legalizuar dhe që ka ngritur alarmin deri në Bruksel.
E pyetur nga gazetarët nëse ligji do të përdoret nga qeveria në “lojën” për të grumbulluar sa më shumë vota në fushatën elektorale të zgjedhjeve vendore të vitit 2023, Ibrahimaj tha se nuk dihet nëse ky ligj do të zbatohet vitin e ardhshëm, duke i lënë të hapura të gjitha kartat.
“Amnistia fiskale është një proces i cili ka rifilluar që në pranverë, kemi punuar me përmirësimin e draftit të punuar nga Ministria e Financave dhe e Ministria e Drejtësisë, që fillimisht daton në 2020, jemi ende ne fazë konsultimi. Se kur do finalizohet drafti nuk e kam ende një përgjigje. Po shohim elementet teknikë dhe hartimin e akteve nënligjore që përpara se të miratohet ligji të ketë qartësi dhe për elementet si do zbatohet, është një punë në proces që nuk mban ende një datë për miratimin. Nuk e dimë nëse do jetë në zbatim për zgjedhjet e vitit të ardhshëm”, deklaroi ministrja e Financave.
