Kryeministri, Edi Rama ka refuzuar të japë një përgjigje në lidhje me deklaratën e bërë nga Yuri Kim, e cila u shpreh se udhëheqësit duhet të zgjedhin se kush e ka në dorë këtë vend, qytetarët apo kriminelët.
Deputeti i Partisë së Lirisë, Petrit Vasili, thotë se Edi Rama refuzon t’i përgjigjet pyetjes së ambasadores, pasi ka zgjedhur prej kohësh që vendin “t’ia dorëzojë kriminelëve”.
“Pyetja e Yuri Kim eshte shume e drejte dhe e vertete! Rama ka te “drejte” qe refuzon pyetjen e Yuri Kimit. Sepse Rama e ka bere me kohe zgjedhjen e tij dhe ja ka dorezuar vendin krimineleve, trafikanteve dhe pastrimit te te gjithe llojeve te parave te pista”, shkruan në një postim në Facebook, Vasili.
Në një intervistë për emisionin “Now” në Euroneës Albania, Rama u shpreh se nuk mund të hidhet baltë për 99% të shqiptarëve, për faktin se 1% është e lidhur me botën e krimit.
“E para, unë e refuzoj kategorikisht këtë gjuhë që udhëheqësit duhet të zgjedhin kush duhet ta qeverisë këtë vend, qytetarët apo kriminelët. Për sa më takon, si udhëheqës i këtij vendi, e kam bërë zgjedhjen me kohë. E kam bërë zgjedhjen kur kam dalë kundër regjimit komunist, e kam bërë zgjedhjen kur kam hyrë në politikën shqiptare dhe e bëj zgjedhjen time çdo ditë, nuk kam asnjë dilemë për këtë. Nga ana tjetër, të akuzosh unblock, nuk ndihmon fare qytetarët, nuk ndihmon fare luftën kundër krimit dhe pastrimit të parave, por përkundrazi, krijon një mjegull të madhe ku të vetmit përfitues janë kriminelët dhe pastruesit e parave. Për 1% të shqiptarëve që janë të lidhur me botën e krimit, nuk mund të hidhet baltë mbi 99% të tyre, as jashtë dhe as brenda”, tha ai.
