Partia e ish-kryeministrit Boyko Borisov, “GERB” ka fitur zgjedhjet e përgjithshme parlamentare në Bullgari, siç tregojnë rezultatet e pjesshme të publikuara sot.
Me zyrtarët e Komisionit Zgjedhor që kanë numëruar 99% të votave nga votimet e së dielës, GERB-i del fituese me 25.4% të votave.
GERB është një parti e qendrës së djathtë, por e fajësuar për drejtimin e vendit gjatë viteve të korrupsionit masiv.
Ndërkohë, Partia qendrore kundër korrupsionit “Ne Vazhdojmë Ndryshimin” renditet e dyta me 20.2% të votave në zgjedhjet e katërta kombëtare të Bullgarisë në më pak se dy vjet.
Rezultatet përfundimtare zyrtare për vendin më të varfër të BE-së priten të publikohen të enjten pasi të numërohen votat jashtë shtetit.
Borisov ka të ngjarë të përballet me vështirësi për të formuar një koalicion qeverisës, teksa ai akuzohet edhe si politikani që çoi vendin sërish në zgjedhje të parakohshme, pasi rrëzoi koalicionin e brishtë të udhëhequr nga Kiril Petkov me një votë mosbesimi që lidhej fortë me veton bullgare për Maqedoninë e Veriut, në qershor.
Petkov ka thënë më parë se do të refuzonte të qeverisë me Borisov. Megjithatë, analistët thonë se partitë politike, të vetëdijshme për rreziqet ekonomike nga lufta në Ukrainë dhe zhgënjimin e votuesve me paqëndrueshmërinë politike, mund të fshijnë dallimet e tyre.
