Deputetja e Partisë Demokratike, Jorida Tabaku i ka bërë thirrje opozitës që të mos votojnë ligjin për amnistinë fiskale e cila do 84 vota për t’u miratuar në Kuvend.
Gjatë një deklarate për mediat nga Kryesia e Kuvendit, Tabaku tha se opozita duhet të tregojë që është e bashkuar.
“Ligji për amnistinë fiskale është një barrë për bizneset e ndershme dhe është një barrë që Shqipëria nuk ka luksin ta ketë. Ajo që unë kam kërkuar dhe i kërkoj të gjithë deputetëve të Partisë Demokratike dhe opozitës të mos votohet ligji për amnistinë fiskale, Ligji për amnistinë fiskale kërkon 84 vota dhe që këto vota të arrihen kërkohet të merren nga ai gjithë spektri politik. Unë besoj se këtu duhet të tregojë opozita që është e bashkuar, me një shenj dhe një sinjal në mbështetje të biznesit të ndershëm dhe procesit të integrimit në BE”, tha Tabaku.
Kujtojmë që ligji për amnistinë fiskale është kundërshtuar nga Bashkimi Europian pasi argumentojnë se ky ligj mund të bëhet një “trampolinë” e përshtatshme për të “pastruar” lekët që mund të jenë përfituar nga aktivitete kriminale.
