Nga Boldnews.al
Flamur Golemi, kryetar i Bashkisë së Gjirokastrës, me apo pa dashje, ka zbuluar një mashtrim të kryeministrit Edi Rama për rrugën e fshatit Zhulat. Kreu i qeverisë, në një status në facebook, shkroi se drejt përfundimit një rrugë, e cila do të krijonte akses edhe për banorët e fshatit Zhulat. Por, Rama “ngatërroi” rrugët e fshatrave, pasi për të shkuar në fshatin Zhulat, i cili është një nga 100 fshatrat turistikë, vetëm me “qerre” mund të shkosh. Dhe, këtë mashtrim të Ramës e zbuloi Golemi, i cili, në të njëjtën kohë kur Rama bëri këtë status, hapi një tender për “rehabilitimin e rrugës për në Zhulat”. Por, nga karahasimi i fotove të Ramës me ato të Golemit ka një ndryshim tepër të madh. Golemi shkruan se rruga është tepër e amortizuar, ndërkohë që Rama poston asphalt dhe rrugë të zgjeruar. Tani, kujt t’i besojnë qytetarët apo banorët e zonës, Ramës apo Golemi?!
Pak ditë më parë, kryeministri Edi Rama shkruante në facebook “drejt përfundimit ndërtimi i rrugës së Fushë Bardhës, që do të bëjë të mundur krijimin e aksesit për banorët e fshatrave përreth si: Fushë Bardhë, Zhulat, Taroninë me aksin e ri Kardhiq-Delvinë🤝. Ky segment jo vetëm që do të lehtësojë lëvizjen, por do të krijojë një tjetër hapësirë zhvillimi turistik e bujqësor për zonat përreth”. Ndërkohë, BoldNeës.al kontrolloi edhe komentet poshtë këtij statusi, ku qytetarë të ndryshëm kanë “kritikuar” Ramën. “Ore zotëri, ku e kap Zhulatin kjo rruga more se na habite. Eja në Zhulat një herë edhe shikoje që rruga e Zhulatit nuk ka lidhje me këtë që reklamon ti. Kur të vish eja me mjet të fortë, ndonjë zetor sepse makinat e mira prishen nga rruga me gropa edhe pa investim. Hë t’u bëfsha” shkruan një qytetar. Ndërkohë, një tjetër shkruan se “është një rrugë ku mezi mund të shkëmbehen dy vetë me biccikleta!”. Një tjetër person shkruan se “tani e ka radhën Zhulati, se e kemi në 100 fshatra”, ndërsa i përgjigjet dikush “Jo do jetë 101 se po të ishte për 100 fshatrat do ishte bërë më përpara”.
Ndërkohë, në të njëjtën kohë me këtë status, Bashkia e Gjirokastrës hapi një tender me objekt “mirëmbajtje e rrugës Zhulat”, me një fond prej 11.493.243 lekë pa TVSH, ndërsa kohëzgjatja e kontratës për zbatimin e saj është 77 ditë. Bashkëlidhur, Golemi kishte speficikimet e gjendjes aktuale të këtij aksi. “Ky aks rrugor është i paasfaltuar dhe aktualisht gjendja teknike e rrugës është jo e mirë. Ndërhyrja parashikon mirëmbajtje të pjesshme të rrugës, mbrojtje lumore, ndërtimin e një tombino dhe muri mbajtës, sistemimin me beton me gjerësi mesatare 4.2 metra të rrugës në pjesët e saja më të vështira” shkruhet në këto dokumente.
Bashkia thotë se rruga është e gjatë mbi 3 kilometra, ndërsa kërkon ndërhyrje emergjente, pavarësisht se Rama e bëri fakt të kryer se banorët e këtij fshati do të kenë asfalt. “Theksojmë faktin se këto janë punime emergjente mirëmbajtje që aksi rrigor të jetë funksional për periudhën e dimrit dhe ndëryrjet në pjesën nga qendra e fshatit Zhulat deri në afërsi të investimit të parashikuar nga Bashkia” thuhet në këto dokumente. Pra, një rrugë e paasfaltuar, madje me gropa të mëdha dhe duhet të ndërhyhet urgjentisht. Krahas këtij shpjegimi, Golemi ka vendosur edhe disa fotografi të gjendjes aktuale, ku duken “nata me ditën” me fotot e postuara nga Rama. Tani, gjithsecili mund të japë opinionin e vetë, gënjen Rama apo Golemi?!
