Bashkimi Evropian beson se sabotimi është shkaku i mundshëm i rrjedhjeve nga gazsjellësit Nord Stream 1 dhe 2.
“Këto incidente nuk janë rastësi dhe na prekin të gjithëve”, tha shefi i politikës së Jashtme të BE-së, Josep Borrell.
Ai tha se të gjitha informacionet në dispozicion tregonin se rrjedhjet ishin rezultat i një akti të qëllimshëm.
“Ne do të mbështesim çdo hetim që synon të fitojë qartësi të plotë mbi atë që ndodhi dhe pse, dhe do të ndërmarrim hapa të mëtejshëm për të rritur qëndrueshmërinë tonë në sigurinë energjetike,” tha ai.
Borrell tha se çdo ndërprerje e qëllimshme e infrastrukturës energjetike të Evropës është e papranueshme dhe do të përballet me një “përgjigje të fortë dhe të bashkuar”.
Tre rrjedhje u zbuluan në tubacionet që transportonin gaz nga Rusia në Evropë përmes Detit Baltik, në zonat ekskluzive ekonomike të Danimarkës dhe Suedisë në ishullin danez të Bornholm.
