Partia Demokratike dhe Partia e Lirisë duket se janë të dyja në një mendje për strategjinë që do të përdorin për të mundur Edi Ramën në zgjedhjet vendore të 2023.
I pari ishte Ilir Meta që nga konferenca për mediat e ditës së sotme hodhi topin në fushën e selisë blu me një mesazh të qartë për kreun e saj Sali Berisha.
Ai theksoi se mënyra e vetme për të rrëzuar nga pushtetit qeverinë është dalja me një kandidat të vetëm, pasi kushtet dhe situata në të ciilën ndodhet vendi është e tillë që motivon këtë vendim.
“Objektivi ynë kryesor është fitorja e opozitës, pavarësisht se çdo forcë politike ka ambiciet e saj. Ne jemi të hapur për të bashkëpunuar me PD dhe faktorët e tjerë opozitarë që të mbështeten kandidatët më të mire. Sa i takon asaj me po me jo, po opozita duhet të dalë në të gjithë Shqipërinë me kandidatë të përbashkët. Kjo është më e mira për situatën sepse jemi në kushtet e një shteti mafioz dhe opozita duhet të paraqitet sa më e bashkuar”, tha Meta.
Teksa ish-kryeministri Berisha nuk ka bërë ende një deklaratë për këtë kërkesë të shprehur hapur nga Meta, nga PD zëri i parë pro thirrjes së kreut të PL, është deputeti Belind Këllici.
Ai tha se janë të ftuara edhe partitë e tjera t’i bashkohen koalicionit opozitar, por zbuloi edhe në detaje skemën sesi do të bëhet përzgjedhja e kandidatëve të përbashkët dhe rolin e primareve në PD në seleksionimin e tyre.
“Do të kemi marrëveshje koalicioni PD-PL, por edhe partitë e tjera që duan të hyjnë. Do të ndahen edhe zonat e caktuara për të cilat do të diskutohet edhe pesha politike e partive respektive, do të diskutohet edhe mënyra e procedimit, por kandidatët do të dalin nga primaret dhe opozita do të shkojë me një kandidaturë. Do të votojnë anëtarët e PD, por edhe simpatizantët që nuk janë të anëtarësuar në PD”, zbuloi Këlliçi në një intervistë për SyriTV.
