Është liruar nga burgu 1 nga 4 të akuzuarit për përdhunimin e 15-vjeçares në Rrëshen.
Mësohet se, Ardjan Gjinkolaj, 18 vjeç është liruar nga burgu kur ka kaluar një vit e gjashtë muaj nga arrestimi i tij për ngjarjen që tronditi Rrëshenin.
Vendimi është marrë sot nga Gjykata e Lezhës, e cila ka vendosur ta lërë Gjinkolajn në masën e sigurisë ‘arres në shtëpi’. Tashmë pas hekurave për të njëjtën vepër penale janë tre persona të tjerë, Ermal Trazhi, Nikë Lleshi dhe Albert Molla. Ndaj të akuzuarve është ngritur akuza “Marrëdhënie seksuale me të ose homoseksuale me dhunë me të mitur të moshës 14-18 vjeç” e kryer në bashkëpunim.
Si u zbulua abuzimi?
Babai i të miturës ka rrëfyer për mediat se ngjarja e rëndë ka ndodhur më 8 mars, kur Artan Kaçorri ka shkuar dhe ka marrë 15-vjeçaren në shkollë. Sipas prindërve të vajzës, 31-vjeçari e ka marrë vajzën me zor në makinë dhe e ka droguar. Më pas ai ka kryer marrëdhënie seksuale me të, dhe e ka dërguar tek Nik Lleshi, i cili gjithashtu ka abuzuar seksualisht me të. Me anë të një videoje, ata e kanë shantazhuar vajzën e cila nga frika është detyruar të kryejë marrëdhënie seksuale me dhunë në grup.
Ka qenë e ëma e të miturës që ka dyshuar se me vajzën diçka nuk shkonte pasi i ka gjetur një telefon ilegal i cili i qe dhuruar nga autorët. Brenda telefonit gjendeshin foto e video, me të cilat ata i bënin shantazh për të kryer marrëdhënie seksuale me persona të tjerë.
