Një vrasje me armë zjarri ka ndodhur këtë të Martë në Pukë, në rrethana ende misterioze për Policinë.
Viktima është 44-vjeçari Pjetër Kola Nga Lezha.
Sipas bluve, ai u paraqit në qendrën shëndetësore të Vaut të Dejës rreth orës 18:00. Mjekët vendosën transportimin e tij drejt spitalit të Shkodrës për mjekim më të specializuar. Aty, 44-vjeçari humbi jetën.
Autorët mbeten ende mister ashtu si dhe dinamika. Policia bën të ditur vetëm se plagosja ka ndodhur “në fshatin Qafë Çelë në rrethana ende të paqarta”.
“Rreth orës 18:00, në qendrën shëndetësore të Vaut të Dejës është paraqitur për ndihmë mjekësore, shtetasi Pjetër Kola, 44 vjeç, nga Lezha, i plagosur me armë zjarri, në rrethana ende të paqarta, në fshatin Qafë Çelë, Pukë. Ky shtetas është transportuar në Spitalin Rajonal Shkodër, për ndihmë mjekësore më të specializuar, i cili ndërroi jetë në spitalin e Shkodrës. Është ngritur menjëherë grupi hetimor dhe nën drejtimin e Prokurorisë pranë Gjykatës së Rrethit Gjyqësor Shkodër vijon puna për zbardhjen e rrethanave të ngjarjes, identifikimin dhe kapjen e autorit/ve”, njofton policia.
Sipas burimeve policore, fillimisht në qendrën shëndetësore në Vaun e Dejës, 44-vjeçari u transportua nga dy persona ende të paidentifikuar, të cilët janë larguar sapo e kanë lënë të plagosurin aty. Identifikimi dhe marrja në pyetje e këtyre personave mund të hedhë dritë mbi dinamikën e ngjarjes.
