Kriza ekonomike, inflacioni në rritje, mungesa e indeksimit të pagave janë disa prej faktorëve që deri më tani po “asfiksojnë” ekonominë shqiptare dhe po rrisin varfërinë në shifra ekstreme në vend.
Teksa paketat e ndihmës së qeverisë janë thuajse qersharake me vetëm 50 milionë euro që përfliten të alokohen pas votimit në Kuvend të propozimit më të ri të Ministrisë së Financave, vendosja e fashës së energjisë në 800kWh duket se do të jetë “shkelmi në fyt” për familjet shqiptare.
E si të mos mjaftonte këto një strukturë tjetër, e krijuar nga qeveria Rama me pretendimin se do të siguronte paprekshmërinë e konsumatorit nga konkurenca e pandershme dhe çmimet abuzive në “kohë lufte”, duket se po ia “pi gjakun” qytetarëve çdo ditë.
Po flasim për Bordin e Transparencës, ky organ me shumë kompetenca por që me standarte të dyfishta sa i përket mënyrës sesi reflektojnë çmimet në bursën ndërkombëtare të tregut të karburantit, me ato në tregun vendas, është shndërruar në një “përbindësh” financiar.
Teksa çmimi i naftës në bursë ka zbritur në nivelet e para luftës, madje i është afruar shifrave të 2021, kur konflikti i armatosur Rusi-Ukrainë as që mendohej të ndodhte, në Shqipëri çmimi çuditërisht vijon të rritet.
Dy ditë më parë ishte vendimi i fundit i Bordit që i surprizoi të gjithë, pasi çmimi i naftës u rrit me 7 lekë dhe prej 48 orësh shitet me 223 lekë/litri nga 216 lekë/litri që ishte përgjatë javës së kaluar.
Ndërkohë që çmimi i benzinës mbeti i pandruyshuar ku një litër shitet me 194 lekë, Bordi rriti me 1 lek për litër çmimin e gazit, i cili tregtohet tashmë me 78 lekë/litri.
Por, paradoksal është fakti se nafta po tregtohet aktualisht në bursë me 85 dollarë fuçia, shifra më e ulët e arritur që prej janarit të këtij viti.
Ndërsa në krahasim me një vit më parë nafta bruto po tregtohet me 7 deri në 12 dollarë më shtrenjtë pasi në shtator të vitit të kaluar çmimi i naftës bruto në tregjet e huaja luhatej në vlerat 73-78 dollarë fuçia.
Pavarësisht kësaj, duket se reflektimi i bursës ndërkombëtare nuk e bind aspak Bordin e Transparencës, i cili vijon t’i bëjë “fresk” qeverisë Rama, ndoshta edhe si shpërblim për faktin që e krijoi dhe vijon t’i lejojë komptenca në një kohë kur opozita dhe qytetarët kërkojnë çdo ditë zhbërjen e tij.
