Një 44-vjeçar është arrestuar në pikën kufitare të Morinës këtë të Dielë.
L.S, banues në Tiranë është kapur në flagrancë duke transportuar 5 emigrantë të paligjshëm në këmbim të pagesave monetare.
“Shërbimet e Policisë Kufitare Morinë, në bashkëpunim me shërbimet e DVP Kukës, në zbatim të planit të përbashkët të masave për goditjen e aktivitetit kriminal në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit, kanë vijuar kontrollet intesive, për këtë qëllim.
Si rezultat u arrestua në flagrancë shtetasi L. S., 44 vjeç, banues në Tiranë.ky shtetas u kap në flagrancë nga shërbimet e Policisë, në fshatin Morinë, në afërsi të kufirit me Kosovën, duke transportuar me automjet, 5 emigrantë të paligjshën, të cilët do t’i ndihmonte që të kalonin në mënyrë të paligjshme, kufirin me Kosovën, kundrejt fitimit”, njofton policia.
Në cilësinë e provës materiale u sekuestrua automjeti dhe 900 euro. Materialet i kaluan Prokurorisë pranë Gjykatës së Rrethit Gjyqësor Kukës, për veprime të mëtejshme.
