Ministrja për Evropën dhe Punët e Jashtme, Olta Xhaçka, mori pjesë në takimin e Ministrave të Jashtëm të Procesit të Bashkëpunimit të Evropës Juglindore (SEECP) që u mbajt në Nju Jork. Ministria për Europën dhe Punët e Jashtme ka publikuar foto të kryediplomates Xhaçka me dy kryediplomatët e Greqisë dhe Turqisë.
Në foto duket se ministrja e Shqipërisë po diskuton me atë të Turqisë, Mevlüt Çavuşoğlu dhe atë të Greqisë, Nikos Dendias, vendet e të cilëve kryeministri Edi Rama i ka ftuar për t’ju bashkuar në nismën “Open Ballkan”.
Procesi i Bashkëpunimit të Evropës Juglindore (SEECP) ka për qëllim forcimin e marrëdhënieve të fqinjësisë së mirë ndërmjet të gjithë pjesëmarrësve nga Evropa Juglindore dhe transformimin e këtij rajoni në një zonë paqeje, sigurie, stabiliteti dhe bashkëpunimi, me synimin kryesor integrimin e plotë të tij në strukturat evropiane dhe euroatlantike.
