Kryedemokrati Sali Berisha në komunikimin virtual që po zhvillon me qytetarët ka premtuar se me ardhjen në pushtet të Partisë Demokratike, një nga koncesionet e para të qeverisë Rama që do të anulohet, është ai i check-up.
“Është një shkrirje e familjeve Koleka e Nushi në një plaçkitje dhe grabitje të tmerrshme të qytetarëve shqiptarë. Këtë nuk e pranojnë vendet më të zhvilluara. Do anulohet dhe do të shkojnë para gjyqit, si Vilma Nushi, Ilir Beqja dhe Edi Rama, të cilët iu vërsulën të përdorin shëndetin e qytetarëve shqiptarë për të vjedhur qindra miliona euro”, tha Berisha.
Ish-kryeministri e cilësoi Check-up-in një koncesion familjar Rama-Vilma Nushi dhe për ta provuar këtë shtoi se me urdhër të kësaj dyshe është “asgjësuar” ligji për sigurinë e barnave.
“Informoj shqiptarët, se Vilma Nushi është një nga më kryesoret në shkatërrimin e sigurisë së barnave në Shqipëri, pasi me angazhimin e kushëririt të saj nga burri, Edi Ramës, hoqi ligjin, sipas të cilit në Shqipëri nuk mund të futeshin ilaçe që nuk përdoren në territoret jashtë BE. Pas heqjes së kësaj, Shqipëria u shndërrua në koshin e ilaçeve të skaduara nga Beogradi gjer në Bangladesh”, shtoi kreu i selisë blu.
