Nga Boldnews.al
Për 14 muaj rresht, pa pushim, hakerat përdhunuan me dëshirë e “viktimës” sistemin dixhital të ngritur me plot bujë nga qeveria jonë. Ne mendonim të ngrinim satelitët në orbitë, por “çunakët iranianë” bënin qejf në orgjinë dixhitale që iu shfaq tërësisht e zhveshur nga çdo mbrojtje. Ky skandal që do kishte rrëzuar me kohë çdo ngrehinë qeveritare është kaluar fare lehtësisht në Parlament.
Dy ministre ishin mprehur bejagi për të mbrojtur më të pambrojtshmën e madje u justifikuar se vërtetë ata na “përdhunuan sistemin dixhital”, por ishin aq të fuqishëm sa vonë pas 14 muajsh e kuptuan se çdo ditë fusnin e nxirrnin të dhëna duke na ekspozuar çullak. Por qeveria është e “ndershme”, nga përdhunimi masiv dixhital dolën edhe më të fuqishëm.
Zëvendëksryeministrja Belinda Balluku u shpreh se sulme të tilla ndodhin kudo madje edhe në vende të zhvilluara. Njëkohësisht gati e bënë fakt të kryer se nga ky sulm do të dalin edhe më të fortë, sepse do të investojnë për mbrojtjen kibernetike. Një lajm që gëzon pa masë Beqet e Rilindjes të cilët do kënë një arsye më shumë se gjoja me ekspertizën e tyre në forcimin e sistemit dixhital do të arrijnë të fusin duart e ndyra në tenderat publik. Në një lloj forme edhe na përdhunojnë edhe na vjedhin.
Asnjë fjalë nuk thanë ministret dhe ministrat për të dhënat e një milion shqiptarëve që nxorri qeveria me patronazhistët pak muaj para zgjedhjeve. Nuk i bën fare përshtypje as nxjerra e të dhënave për pagat e shqiptareve dhe automjetet dhe targat e tyre. Me shumë zell edhe ministrja Elisa Spiropali u pa mjaft aktive në mbrojtje të qeverisë dhe mazhorancës duke shpalosur nga fjalori i saj plot sarkazëm, ironi dhe bagazh enciklopedik fjali me patos mes delirit për të mbrojtur shefin e madh, që me përkedheli e quan edhe “Skërderbe”.
Në çdo vend edhe anormal si i joni, ky skandal minimalisht do të trondiste themelet e një qeverie, sado autokrate të ishte. Gjithashtu do ishte e vështirë të gjendej një zë publik e aq më pak politik që të mbronin krimin më të madh që këtë herë ishte më shumë se një “përdhunim online”.
Asgjë nuk ka mbetur pa u zbuluar. Emailet e kryeministrit dolën sheshit, emailet e ish-kreut të Policisë së Shtetit gjithashtu, të dhënat e sistemit TIMS duke ekspozuar edhe me video nga pikat e kalimit kufitar gjithashtu ishin një film pa pare, edhe pse është hedhur para e madhe në krijimin e gjoja sistemit më të përparuar dixhital në tërë Evropën.
Që jemi vendi më kontrovers i mbytur në korrupsion dhe i zhytur në varfëri kjo nuk ka nevojë të zbulohet nga “kibernetika e sulmuar”, por që marrina kolektive të shkonte deri në pikën e papargjeshmërisë sikur asgjë nuk ka ndodhur kjo ja vlen të studiohet nga profesorët e mëdhenj psikoterapistë që të kuptojnë mendjen dhe Talltrapistëve dhe Blisave të Ramës.
