Qeveria është kthyer në qesharake duke përgënjeshtruar vetveten për të mbuluar dështimet e sistemit dixhital kundrejt sulmeve kibernetike. Hakerat ja arritën të rrëzonin sistemet online të institucioneve si dhe zbuluan dokumente të klasifikuara sekret.
Përballë këtij dorëzimi para piratëve të internetit, pa mundur të justifikojnë në asnjë moment milionat e shpenzuara në fushën e dixhitalizimit, qeveria po shpik, përgënjeshtron vetveten dhe rishpik justifikimet për të mbuluar dështimin.
Më 10 Shtator, kryeministri Edi Rama, përmes një njoftimi në Twitter pranoi sulmin e dytë kibernetik pas atij që rrëzoi sistemin e-albania muaj më parë.
Atë paradite, qytetarët mallkonin dhe zotoheshin se do të grisnin pasaportat, të lodhur nga radhët në pikat kufitare, ku u thuhej se “sistemet nuk punojnë, ju duhet të prisni”.
Më vonë gjatë ditës, Ministria e Brendshme konfirmoi se janë sulmuar sistemet e policisë, që për ditë më radhë janë jashtë funksionit.
Kryeministri Edi Rama dhe shpura e tij nxituan të deklaronin e ripërsërisnin se nga sulmi kibernetik nuk janë marrë të dhëna sekrete.
“Të dhënat janë krejtësisht irrelevante sa i përket sensitivitetit të tyre. Një pjesë e tyre janë publikuar, vendime qeverie, shkresa që qarkullojnë në rrjetin e brendshëm dhe të cilat mund të merren nga çdo i interesuar apo nga çdo gazetar me një kërkesë të thjeshtë, pra nuk janë dokumente sekrete apo të fshehta”, u shpreh Rama në një komunikimin me gazetarët të Shtunën e 17 Shtatorit.
Gënjeshtar u zbulua shpejt. Grupi “Homeland Justice”, që ka marrë përsipër autorësinë e dy sulmeve kibernetike në vend, publikoi të Hënën në “Telegram” disa materiale që besohet se janë marrë gjatë sulmit kibernetik. Ndër to kishte disa dokumente të klasifikuara si “sekret”.
Këtë të Enjte çështja u diskutua në seancën planuare, ku në mungesë të kryeministrit Edi Rama ishte zëvendësja e tij Belinda Balluku ajo që mori përsipër të mbrojnë dështimin e qeverisë.
Teksa përpiqej të justifikonte dështimin qeveritare përballë sulmit kibernetik, Balluku u duk se u emocionua dhe bëri një lapsus: Iranin e quajti “shtet fqinjë”.
Më pas, gënjeu kur tha se kryeministri Edi Rama nuk ka deklaruar se janë shmangur marrja e sekreteve, por sipas saj, ka deklaruar se është shmangur qëllimi i hakerave që ishte fshirja e të dhënave në sisteme.
Në fakt deklaratë kjo që është bërë nga Rama, ashtu siç është bërë ajo që paraqitëm më larët, me kryeministrin që ka deklaruar se të dhënat e marra nga hakerat janë “krejtësisht irrelevante sa i përket sensivitetit të tyre” dhe “nuk janë dokumente sekrete”.
Përgjigjen në replikë e mori nga deputeti demokrat Ervin Salianji. “Asnjë shteti tjetër nuk i kanë rënë pantallonat në fund të këmbëve siç i kanë rënë Shqipërisë”, tha deputeti.
