Vendimi i një dite më parë i Prokurorisë së Tiranës për ndalimin e publikimit nga mediat vendase të të dhënave të përfituara nga sulmi kibernetik që goditi sistemet e informacionit të Policisë së shtetit, të cilat janë hedhur online, ka sjellë reagime nga komuniteti i gazetarëve shqiptarë.
Në një deklaratë për rastin, Unioni i gazetarëve shqiptarë shprehet se “ky vendim dhe paralajmërimi kërcënues për mospublikim të asnjë të dhëne të botuar nga autorët e sulmit kibernetik në mediat audiovizive, të shkruara, online, rrjetet sociale apo në formë të publikimit apo transferimit të të dhënave, le vend për diskutim dhe krijon hapësirë për ndikim censurues mbi mediat dhe gazetarët”.
Nga njëra anë Unioni i bën thirrje, gazetarëve dhe redaktorëve “të dëshmojnë përgjegjësi dhe ndërgjegje të lartë shërbimi publik. Të vlerësojnë si asnjëherë më parë, aspekte të informacioneve që kanë të bëjnë me sigurinë kombëtare dhe mbrojtjen e jetëve njerëzore dhe dëmtimin e qytetarëve”.
Ndërsa nga ana tjetër vlerëson se “vendimi i prokurorit të Prokurorisë Gjyqësore dhe paralajmërimi kërcënues për nisje hetimesh, përbëjnë në mos një kërcënim të drejtëpërdretë, padyshim të tërthortë, për lirinë e informimit, të fjalës dhe të raportimit. Krijon premisë të fortë për censurim dhe vetëcensurë në realitetin informues”.
Sipas Unionit “kjo masë nuk parandalon dhe as nuk mbron. Ky vendim, vetëm ndëshkon diçka tjetër, të drejtën profesionale që ka lidhje me lirinë themelore në shoqërinë tone”, ndërsa vë në dukje se “aktualisht në mediat ndërkombëtare dhe rrjetet e online-t në rajon, po qarkullojnë dhe publikohen këto të dhëna pavarësisht vendimit të prokurorit”.
Kundër urdhërit të Prokurorisë, janë shprehur dhe gazetarë apo drejtuesë të portaleve të informacionit. Në disa prej tyre edhe sot ka vijuar publikimi i informacioneve të përfituara nga shpërndarja online e shkëmbimit të emaleve të ish Drejtorit të Përgjithshëm të policisë shqiptare Gledis Nano.
Në një deklaratë të bërë publike pasdite, ku flet për hetimet mbi sulmet kibernetike, Prokuroria e Tiranës deklaron se vendimi i saj “nuk ka për qëllim pengimin e veprimtarisë së Medias por është kryer në kuadër të një procedimi penal ku publikimi apo shumëfishimi mediatik i informacioneve të klasifikuara dhe sensitive (që është në vetvete qëllimi kriminal i këtij sulmi), informacione këto të vjedhura, do të cënonte rëndë si ecurinë e hetimeve, ashtu dhe sigurinë e çdo qytetari të Republikës së Shqipërisë”.
Autoriteti i Mediave Audiovizive (AMA), gjithashtu deklaroi sot përmes një deklarate se “duke respektuar standardin e veprimtarisë së lirë audiovizive, apo të pavarësisë editoriale në hartimin dhe prodhimin e katalogëve të programeve nga subjektet e licencuara, AMA, ka pritshmëri që redaksitë të tregojnë maturi dhe përgjegjësi profesionale në prezantimin dhe trajtimin e publikimit të të dhënave që janë përftuar në mënyrë të paligjshme nga grupe hakerash iranianë në sistemet kompjuterike të institucioneve publike shqiptare”. AMA vijon më tej me thirrjen që “të evitohen publikimet e përmbajtjeve që pengojnë dhe dekonspirojnë hetimin e organit procedues”./VOA/
