Lihet në qeli Jeton Lami, agjenti që ndihmoi Ervis Martinaj.
Në Gjykatën e Apelit të Tiranës u mbajt sot seanca gjyqësore ndaj efektivit Jeton Lami, i cili akuzohet se ka ndihmuar të shumëkërkuarin, Ervis Martinaj gjatë kohës që ky i fundit ishte shpallur në kërkim.
Ish-oficeri i operacionales, Jeton Lami ka kërkuar lirinë në Gjykatën e Apelit, ndërkohë që vazhdon të mbetet mister fati i Ervis Martinajt edhe pse kryeministri tha se shumë shpejt do të ketë një version zyrtar për të.
Gjykata vendosi konfirmimin e vendimit të shkallës së parë, që caktoi arrest me burg për Lamin.
Jeton Lami, pak ditë më parë është transferuar nga burgu i Shën-Kollit në burgun 313 në Tiranë, nën masa të rrepta sigurie.
Sipas hetimeve, Lami shoqëroi Ervis Martinajn dy ditë para zhdukjes së tij duke e transportuar nga Tirana në Durrës dhe anasjelltas.
28-vjeçari nuk ka pranuar të flasë para efektivëve të policisë.
Jeton Lami me banim në Kamëz më herët kishte punuar edhe në komisariatin nr 2 në Tiranë para se të transferohej në sektorin e FAST, njësisë speciale për kapjen e personave në kërkim.
Lami cilësohet si personi kyç për zbardhjen e hetimit që ka nisur për zhdukjen e Ervis Martinajt.
