Sekretari i Përgjithshëm i Partisë së Lirisë, Tedi Blushi ka hedhur akuza të forta në drejtim të kryeministrit Edi Rama dhe kryebashkiakut të Tiranës Erion Veliaj duke i bërë përgjegjës për betonizimin e kryeqytetit.
Gjatë një shkrimi në rrjetet sociale, Blushi poston një video të ndërtimeve në kryeqytet për të treguar situatën kaotike që përballen qytetarët nga zhdukja e gjelbërimit. Blushi thekson se shkatërrimi i hapësirave publike nëpërmjet babëzisë, paligjshmërisë dhe korrupsionit është i vetmi mision që Rilindja ka për Tiranën.
Postimi i plotë nga Tedi Blushi:
“Betonizimi dhe zhdukja e gjelbërimit është një nga krimet më të shëmtuara që Edi Rama dhe Erion Veliaj kanë bërë ndaj Tiranës. Këto pamje të filmuara nga i njëjti kënd, por në dy kohë të ndryshme (maj 2020 dhe shtator 2022) tregojnë qartë se çfarë barbarie ka ndodhur me gjelbërimin prapa ish-Sheratonit nga Rilindja, kjo armike e gjelbërimit dhe e mjedisit.
Masakra e Parkut të Liqenit Artificial është vetëm një provë se si Rama dhe Veliaj kanë mbushur xhepat me paratë e betonit duke bërë trafik me mushkëritë e banorëve të kryeqytetit. Shkatërrimi i hapësirave publike nëpërmjet babëzisë, paligjshmërisë dhe korrupsionit është i vetmi mision që Rilindja ka për Tiranën”
