Anëtari i Këshillit Kombëtar të PD, Arben Ristani, i ftuar në emisionin ‘Task Force’, ka komentuar skandalin e Lulzim Bashës i cili ka marrë financime ruse.
Demokrati theksoi se Partia Demokratike në arkën e saj nuk ka pasur kurrë asnjë financim nga çdo entitet apo person i huaj ndërsa shtoi se s’ka pasur asnjë dijeni për paratë ruse të Bashës deri në momentin kur prokuroria ka nisur hetimet.
Sipas Ristanit, kjo çështje nuk ka të bëjë fare me Partinë Demokratike, ndërsa u shpreh se Lulzim Basha i ka lëvizur personalisht paratë ruse.
“Basha ka të drejtë kur thotë se PD s’ka marrë asnjë qindarkë nga financimet e huaja, aq më pak nga rusët. Ato janë para të cilat ai i ka lëvizur personalisht dhe që vërtetë nuk kanë të bëjnë me PD-në.
Sa i përket Sekretarit të Përgjithshëm, për shkak të statutit të PD i cili në të njëjtin rang zgjedhje, Këshilli Kombëtar zgjidhte edhe Sekretarit e Përgjithshëm dhe kryetarin e Bordit të Financave, kryetari i kësaj të fundit nuk ishte i varur nga Sekretari i Përgjithshëm, për këtë shkak ky i fundit s’ka firmosur asnjë dokument në PD që kishte të bënte me para. Dijenia ime ka qenë zero deri kur filloi hetimi nga prokuroria.
Kjo çështje s’ka të bëjë me PD por vendim personal i Bashës. Nuk është autorizuar nga Kryesia e PD që të zhvillojë marrëveshje lobimi me këdo. Veprimtaria e tij me para të cilat nuk kanë hyrë dhe nuk kanë dalë nga PD.”-tha Ristani.
