Gjykata e Elbasanit ka lënë në fuqi masën “arrest shtëpie” për ish-nëndrejtorin e policisë Albert Nushu dhe Nikollaq Palla.
Të dy akuzohen për veprën penale “shpërdorim detyre” lidhur me vrasjen e Pjerin Xhuvanit disa ditë para zgjedhjeve të 25 prillit. Avokatët kërkuan lehtësimin e masës së sigurisë pasi pretenduan se hetimet kanë përfunduar dhe nuk mund të prishet asnjë provë nga dy të akuzuarit. Prokurorët e dosjes së “21 Prillit 2021”, janë Ritvan Suka dhe Platin Aliçka, ndërsa gjyqtare Idush Maliqi.
Gjithashtu sot në Gjykatën e Elbasanit po zhvillohet edhe seanca ndaj Arbër Paplekajt, i akuzuar për vrasjen e Pjerin Xhuvanit.
Ngjarja e Elbasanit
Ngjarja e rëndë ndodhi në lagjen “5 Maj” në Elbasan. Për organin e akuzës, Paplekaj është autori i dyshuar i vrasjes së Pjerin Xhuvanit në Elbasan, pak ditë para mbajtjes së zgjedhjeve të 25 prillit.
Sipas Prokurorisë, në incidentin e rëndë që shoqëroi fushatën zgjedhore, ka rezultuar se Arbër Paplekaj, përveç viktimës, ka qëlluar me armën e tij edhe efektiven e Policisë Xhensila Sota, e cila kishte mbërritur në vendin e ngjarjes për të ndërhyrë në konfliktin mes shtabeve elektorale të PS-së dhe PD-së.
Në masakrën e Elbasanit mbeti i vrarë Pjerin Xhuvani dhe u plagosën 4 persona të tjerë. Nga pamjet filmike të analizuara dhe ekspertizat e kryera, ka rezultuar se Paplekaj është personi që qëllon në këndin e drejtimit, ku dhe punonjësja e policisë është duke qëndruar prapa një furgoni të forcave të rendit.
Përveç Paplekajt, Prokuroria ka dërguar për gjykim edhe disa emra të tjerë që përfshihen në këtë dosje penale. Ata janë dy zv.drejtorët e policisë Nikollaq Palla dhe Albert Nushi si edhe 6 policët e forcave ‘Shqiponja’, të cilët akuzohen të gjithë për shpërdorim detyre.
