Ministrja e Arsimit, Evis Kushi ka marrë pjesë në kongresin e arsimit që po zhvillohet ditën e sotme në Tiranë, ku merr pjesë edhe kryeministri Edi Rama.
Kushi mes të tjerash e pranoi që arsimi në Shqipëri po përballet me largimin e të rinjve të cilët sipas saj preferojnë të studiojnë në vendet e Europës Perëndimore për të cilat ajo tha se “po shkojnë drejt plakjes së popullsisë dhe kanë hapur dyert për profesionistët e rinj”.
“Një tendencë me të cilën po përballet i gjithë rajoni ballkanik, një pjesë e të rinjve largohen nga rajoni për studime apo punësim drejt vendeve perëndimore si është Gjermania por jo vetëm. Vende që duke qenë drejt plakjes së popullsisë, e duke pasur nevoja në rritje në tregun e punës kanë hapur dyert për të rinjtë tanë. Veçanërisht për mjekët infermierët, por edhe profesione të tjera të kohës”, tha Evis Kushi.
Ministrja tregoi dhe mënyrën që ka ‘gjetur’ qeveria për t’i mbajtur të rinjtë në vend pas diplomimit.
“Për t’ju përgjigjur kësaj tendence kemi hartuar disa politika të reja. Ndërkombëtarizimi i universiteteve, financime shtesë për programe studimi të përbashketa më universitete prestigjioze evropiane, qëllimi ynë për të rritur cilësinë e për t’i dhënë vlerë diplomave tona s’i në universtietet më të mira të BE.
Përcaktimi i programeve të studimit prioritet kombëtar, bursa studimi më të larta ndonjëherë për studentët që zgjeshin programe si bujqësia, mësuesia, turizmi, me kushtin që studentët pas diplomimit të vijonë të mbesin në Shqipëri të japin kontribut për vendin”, tha Kushi.
