Ambasada Amerikane në Tiranë sërish i ka dalë në krah Shqipërisë duke reaguar fort kundër sulmit kibernetik e cila për më shumë se 24 orë paralizoi pikat kufitare në territorin shqiptar duke krijuar kaos dhe radhë të gjata.
Gjatë një postimi në rrjetet sociale, Ambasada Amerikane i ka dhënë zë, deklaratës së fortë të bërë nga Zëdhënësi i Departamentit amerikan të Shtetit, Ned Price, i cili dënoi sulmin kibernetik ndaj Shqipërisë. Ambasada e SHBA ka ripublikuar deklaratën e Price, i cili shprehet se SHBA do të vijojë bashkëpunimin me Shqipërinë për mbrojtjen nga sulmet kibernetike.
“Dënojmë me forcë sulmin kibernetik të 9 shtatorit kundër aleates sonë në NATO, Shqipërisë, i cili pason sulmin kibernetik të Iranit të 15 korrikut. Ne do të vazhdojmë të punojmë krah për krah me Shqipërinë dhe aleatët e partnerët e tjerë, për të forcuar mbrojtjen kibernetike dhe për t’i bërë përgjegjës aktorët keqdashës”, shkruan zëdhënësi i Departamentit të Shtetit të SHBA, Ned Price.
Ministria e Brendshme dhe Drejtoria e Kufirit dhe Migracionit kanë konfirmuar se sistemi TIMS në Aeroportin Ndërkombëtar “Nënë Tereza” është rikthyer në funksion gjatë mëngjesit të sotëm.
