Shkodra është përfshirë nga një stuhi e fortë dhe reshje të dendura shiu që për disa orë kanë përmbytur disa rrugë të qytetit dhe shumë prej fshatrave.
Gjatë orëve të natës, pedonalja në qendër të qytetit është përmbytur nga rrebeshi i shiut.
Ndërkohë, fshatra të ndryshëm të njësisë Rrethina, pjesë e bashkisë Shkodër kanë dhjetëra hektar tokë të përmbytur ndërsa në disa raste ka edhe banesa që kanë pësuar dëme të ndryshme.
Po ashtu, në rrugën e zonës turistike të Shirokës pranë liqenit të Shkodrës gjatë natës ka patur probleme me rrëshqitjet e dheut duke vështirësuar kështu qarkullimin rrugor.
Institucionet, bashkia Shkodër dhe Prefektura e Qarkut Shkodër janë angazhuar që në orët e para të mëngjesit duke nisur punën për evidentimin e dëmeve të mundshme dhe normalizimin e situatës.
Aktualish,t reshjet e shiut në Shkodër kanë ndaluar dhe rrugët e qytetit që u bllokuan gjatë natës nuk kanë më prezencë uji por kjo situatë gjatë natës ka frikësuar pronarët e subjekteve të ndryshme kryesisht në pedonale. Nata është shoqëruar me stuhi, vetëtima dhe një rrebesh i pazakontë shiu.
