Skuadra e Monzës i ka bërë një start shumë të keq kampionatit dhe deri tani nuk ka siguruar asnjë pikë, pasi ka regjistruar vetëm humbje. Kjo ka bërë që Silvio Berluskoni dhe Adriano Galiani, të fillojnë të mendojnë për shkarkimin e trajnerit XhiovanI Stropa dhe për të afruar një emër të bujshëm në pankinë.
Sipas “La Gazzetta Dello Sport”, ish-drejtuesit e Milanit, janë të gatshëm të afrojnë në klub Klaudio Ranierin, një emër shumë të njohur të trajningut botëror, i cili ka bërë bujë me mrekullitë e tij futbollistike. Më e madhja është padyshim ajo në Premier Ligë, ku jashtë çdo parashikimi ia doli të shpallte kampion ekipin e Leisterit.
Burimet sqarojnë se ka patur një kontakt fillestar mes palëve, por gjithçka do të diskutohet më gjerësisht pas ndeshjes ndaj Leçes, e cila mund të jetë e fundit e trajnerit Stropa në drejtimin e Monzës.
