Anëtari i Këshillit Kombëtar të Partisë Demokratike, Jamarbër Malltezi ka zbuluar të tjera dokumenta duke akuzuar se një pjesë e medias është blerë nga mafia e inceneratorëve.
Në konferencën për shtyp nga selia blu këtë të Shtunë, Malltezi ka theksuar se miku i kryeministrit Edi Rama, Ben Blushi, çoi gruan në Bullgari për të krijuar nga hiçi një kompani guacë të lidhur me aferën e inceneratorëve.
“Dokumenti që po paraqesim sot është episodi i dytë i serialit të blerjes së medias dhe bosëve të saj nga mafia e inceneratorëve. Ky dokument tregon se si drejtori i madh, miku i Ramës, ish-ministri socialist Ben Blushi, e çoi gruan deri në Bullgari që të krijonte nga hiçi një kompani guacë. Partnerët ishin ‘çunat e mirë të inceneratorëve’, që më pas u bënë ‘plehrat në kërkim ndërkombëtar’. Ne, nga kjo foltore i kemi etiketuar si bosët e mafias së plehrave, sepse skema që krijuan, ku përfshiheshin mediat, qeveria dhe kompani offshore, është qartësisht mafioze. Kompania që Blushi hapi në Bullgari, pa asnje kapital, pa asnjë përvojë, i duhej mafies se plehrave per pune te medha, një ndër të cilat ishte blerja e heshtjes se mediave”, tha Malltezi.
Dokumenti tregon se kompania është e ndarë në tri pjesë të babarbarta në zotërim të Blushit, Mirel Mertirit dhe Klodian Zotos, shtoi ai, ndërsa më tej listoi edhe disa pyetje për SPAK.
“Pesë pyetje për SPAK-un, që luan shurdhmemecin, dhe as sheh dokumente as dëgjon fakte: Sa milionë euro nga paratë publike të shqiptarëve kanë përfunduar te kjo kompani në Bullgari? Çfarë ekspertize ka ofruar kjo guaca në Bullgari, me pronarë Blushin dhe mafiozet e plehrave? A është përdorur edhe kjo guaca ne Bullgari për pastrim parash dhe zhdukje gjurmësh se parave publike? A është përdorur kjo guacka edhe për blerje të heshtjes së mediave? A ka vepër penale, kur paratë publike të shqiptarëve përfundojnë në guaca për të zhdukur grabitësit e vërtetë të parave? Apo është përgjigje shumë komplekse? SPAK-ut i urojmë fundjavë të mbarë, ta gëzojë heshtjen e zgjatur! Medias që hesht kur digjen miliona euro të shqiptarëve, vetëm se kanë marrë edhe ata pjesën e tyre, i urojmë shërim të shpejtë! Çunave dhe gocave në kërkim ndërkombëtar, u themi të kenë durim: ju mund të fshiheni, por nuk do të shpëtoni! InceneRamës dhe incEnerjonit u themi se firmat e hedhura do të bëhen një ditë lak”, u shpreh Malltezi.
