Shija e humbjes me shifrat 2-0 përballë Bayern Munich në sytë e tifozëve në San Siro, duket se nuk do të hidhërojë gjatë ekipin dhe stafin e Interit.
Kjo, për shkak të një lajmi të bujshëm që sapo është publikuar në mediat italiane dhe zbulon se klubi legjendar i Milanos, në pronësi të familjes kineze Zhang është shitur te një konglomerat financiar.
Lajmi fillimisht qarkulloi në “Sport Italia” gjatë verës me raportime për negociata midis palëve, por sot gazetari pranë Interit, Elio Corno ka zbuluar se Fondi Arab i Investimeve (PIF) e ka blerë klubin për një shifër të çmendur, prej 1,2 miliardë eurosh.
Elio Corno duke folur në mikrofonat e “Tele Lombardia” thase familja Zhang i ka shitur të gjitha aksionet prej kohësh te sheikët nga Arabia dhe se e gjitha do të zyrtarizohet në pauzën e Botërorit të Katarit:
“Mësova që klubi Nerazzurri u shit për një miliardë euro, gjithçka e kryer. Të gjithë e dinë, por ende nuk është dhënë asnjë informacion zyrtar mbi negociatat që në fakt tashmë kanë përfunduar. Zhang ka shitur Interin. Kinezët po ia dorëzojnë Pif , pronarët e rinj që kanë blerë edhe Newcastle. Gjithçka është bërë dhe e konfirmuar. Interi është në duart e pronarëve të rinj”, tha Corno.
