Nëntë punonjëse të një fabrike të përpunimit të ullirit në autostradën Fier-Vlorë kanë përfunduar në spital paraditen e kësaj të Enjteje.
Dyshimet e policisë, bazuar në ekzaminimet mjekësore, janë se gratë janë helmuar nga aroma e një parfumi që ka përdorur njëra prej tyre.
“Rreth orës 10:00, në Spitalin Rajonal Fier, kanë shkuar me shenja helmimi dhe ndodhen jashtë rrezikut për jetën, 9 shtetase, të cilat punojnë në një fabrikë përpunim ullinjsh, në aksin rrugor ‘Fier – Vlorë’. Nga verifikimet paraprake, dyshohet se helmimi i tyre ka ardhur si pasojë e një reaksioni të shkaktuar nga produkti aromatizues (parfum) i përdorur nga njëra prej këtyre shtetasve”, njoftoi policia.
Grupi hetimor po punon për zbardhjen e plotë të ngjarjes, shtuan të njëjtat burime.
