Ministri i Brendshëm, Bledi Çuçi tha këtë të Mërkurë se do të nisë një hetim pas deklaratave të ish-kreut të Policisë Gledis Nano, se aksionet policore janë dekonspiruar.
Në një dalje për mediat pas mbledhjes së Këshillit të Ministrit, ku edhe njoftoi se drejtuesi i ri i Policisë do të jetë Muhamet Rrumbullaku, Çuçi u pyet lidhur me prononcimin e Gledis Nanos për një televizion francez. Ish-kreu i Policisë, Gledis Nano tha se 14 kriminelë i kanë shpëtuar arrestimit gjatë kohës së detyrës së tij, për shkak të dekonspirimit të aksioneve policore.
Ju jeni në dijeni të informacioneve dhe a është shqetësuese për ju inkriminimi i disa individëve në policinë e Shtetit, u pyet Çuçi.
Në përgjigje, ministri thumboi Nanon duke u shprehur se “kur se di Drejtori i Përgjithshëm i Policisë kur ishte në detyrë, vështirë se do ta dijë ministri këtë gjë”. Ai shtoi se për çështjen do të nisë një hetim, subjekt e të cilit do të jetë dhe Gledis Nano.
“Pa diskutim që është shqetësuese, por edhe pjesë e punës së përditshme që ka Policia e Shtetit dhe AMF për të pastruar radhët e Policisë nga këta elementë që dekonspirojnë punën e Policisë. Në lidhje me deklaratën e ish-Drejtorit të Përgjithshëm të Policisë sigurisht kur se di Drejtori i Përgjithshëm i Policisë kur ishte në detyrë, vështirë se do ta dijë ministri këtë gjë. Kështu që ajo është në hapësirën e informacionit që ka Drejtori i Përgjithshëm i Policisë. Ne padiskutim që do ta hetojmë dhe do ta thellojmë hetimin dhe padiskutim që do përfshihet dhe ish-drejtori i Policisë që ka bërë këtë deklaratë të tillë për të shkuar drejt zbardhjes së të vërtetës dhe për të goditur këdo që dekonspiron nga brenda operacionet e policisë”, tha Çuçi.
