Aksioni i Inspektoratit Kombëtar të Ndërtimit në ambientet e “Prestige Resort”, në Golem, ka hyrë sot në ditën e katërt.
Pavarësisht se kjo e hënë duhet të ishte një ditë pushimi zyrtarisht, pasi është dita e Shenjtërimit të “Nënë Terezës”, fadromat e IKMT kanë nisur punën prej orëve të para të mëngjesit.
Pas shembjes së dy pishinave në resort, fadromat dhe matrapikët janë duke shkallmuar pistën që rrethon atë dhe që bën daljen e pushuesve në det, ndërsa kanë qarkulluar edhe pamje teksa pushuesit, konsumojnë mëngjesin në ambientet e jashtme të hotelit gjatë aksionit.
Ky aksion që nisi prej së premtes ka “ndezur” debatin edhe në politikën shqiptare.
Teksa kryeministri Edi Rama e ka ndjekur nga panairi i verërave në Beograd, në kuadër të nismës “Open Balkans”, në Tiranë, krerët e opozitës, Sali Berisha dhe Ilir Meta e kanë cilësuar si të paligjshëm.
Kreu i Partisë Demokratike është shprehur se ndërmarrja e një akti të tillë në një kohë kur sezoni turistik ende nuk është mbyllur, përbën një lëvizje banditeske.
“Edi Rama ka urdhëruar shkatërrimin e pjesë të resortit në kundërshtim flagrant me ligjin. Ndërmarrja qoftë dhe në zbatim të ligjit të një akti të tillë kur resorti është plot me turistë, është akt i mirëfilltë banditeskt. Goditje që i jepet këtij sektori, shembulli më i keq dhe diskretitues për Shqipërinë. Ajo që unë dënoj me forcën më të madhe e nuk mund të pajtohem sfondi politik i këtyre veprimeve. Janë të dënueshme, antikushtetuese përpjekjet për të shkatërruar një grup mediatik në kundërshtim me ligjet e vendit”, tha Berisha.
Edhe kreu i Partisë së Lirisë deklaroi për mediat se “aksioni i paligjshëm i IKMT në “Prestige Resort” në kulmin e sezonit turistik, është një sulm i drejtpërdrejtë ndaj lirisë dhe pavarësisë së medias”.
Ndërkohë, drejtori i News24, televizionit që është pjesë e kompanisë “Focus Media Group”, në pronësi të Irfan Hysebenlliut, që zotëron edhe “Prestige Resort”, e ka quajtur aksionin e IKMT një sulm të pastër politik ndaj pavarësisë së medias.
Sipas tij, aksioni lidhet me një shkresë që kryeministri Edi Rama i ka dërguar “Neës24” për t’u larguar nga godina ku qëndron prej 20 vitesh, deri në datë 25 korrik.
Në krahun tjetër Ministria e Brendshme e mbrojti aksionin nëpërmjet një komunikate për mediat, duke thënë se gjithçka po kryhet në kuadër të operacionit “Bregdeti Ynë”, i cili është ndërprerë gjatë muajve qershor, korrik dhe gusht, për të rinisur në shtator dhe ka si qëllim rivendosjen e ligjshmërisë në bregdet.
“Nuk është hera e parë që mediat Neës24, BalkanWeb dhe Panorama synojnë të mbulojnë problemet e pronarit të tyre me ligjin, duke marrë rolin e viktimës së lirisë së shtypit. Edhe më keq se kaq, këto media e kanë bërë mesa duket rrugë përdorimin e shantazhit, shpifjes dhe denigrimit ndaj autoriteteve shtetërore, sa herë zoti Irfan Hysenbelliu ka rënë në rrjetën e kontrolleve ligjore”, u kundërpërgjigj MB.
Sipas ministrisë së drejtuar nga Bledi Çuçi, mediat e zotit Hysenbelliu, kanë “shantazhuar, shpifur dhe denigruar drejtoreshën e sapoemëruar të IKMT, Dallëndyshe Bici.
