Diego Haxhiraj alias Teki Haxhiraj alias Diego Hanaj, është shpallur në kërkim si autor i dyshuar i ngjarjes së djeshme në Vlorës, ku u qëllua me armë zjarri drejt një automjeti ku lëviznin dy efektivë policie.
Ai akuzohet për veprat penale “Vrasja në rrethana të tjera cilësuese”, kundër dy ose më shumë personave, mbetur në tentativë dhe “Mbajtja pa leje e armëve dhe e municionit luftarak”.
“Ky shtetas, rreth orës 19:40 të mbrëmjes së djeshme, duke drejtuar automjetin tip ‘Volkswagen’, dyshohet se për motive të dobëta, ka qëlluar me armë zjarri në drejtim të automjetit tip ‘Audi’, me të cilin udhëtonin: Anxhelo Breshani, 25 vjeç, me detyrë punonjës i Patrullës së Përgjithshme në Komisariatin e Policisë Vlorë dhe Narko Mehmetaj, 27 vjeç, me detyrë punonjës i Policisë Kufitare Sarandë, të cilët nuk kanë pësuar dëmtime”, njoftoi policia.
Pas të shtënave Haxhiraj ka braktisur mjetin për tu larguar në këmbë, që është gjetur e sekuestruar nga policia në lagjen “Partizani”, pranë vendngjarjes.
Burime policore bëjnë me dije se makina ka qenë me targa të rregullta dhe prej tyre është arritur në identifikimin e autoritet të dyshuar të ngjarjes.
Dyshohet se pas një parakalimi nga mjeti i efektivëve, i dyshuari ka menduar se po i bëhet pritë dhe për këtë arsye mund të ketë qëlluar drejt tyre.
Mjeti tip “Audi” me të cilin lëviznin policët, ka qenë duke udhëtuar me një automjet privat pa targa dhe xhama të zinj.
