Personi në kërkim për atentatin e djeshmëm ndaj dy efektivëve të policisë në Vlorë, rezulton me precedentë të mëparshëm penalë.
Gati rreth 10 vite më parë, referuar raportimeve mediatike të kohës, në një aksion të policisë së Vlorës të koduar “Skela 1“, u sekuestruar 600 kg marijuanë. Policia njoftoi shpalljen në kërkim të tre personave dhe arrestimin e dy shtetasve. Një prej personave të vënë në pranga ishte Diego Haxhiraj.
Ndërkohë, më 5 janar të këtij viti, 38-vjeçari është plagosur me armë zjarri në dorë.
Pranë banesës në lagjen “Pavarësia”, teksa ishte lëvizur në këmbë, ai u qëllua me armë zjarri. Autorët u larguan me një mjet tip “Audi Q7”, ku u gjet i djegur në fshatin Trevllazën. “Audi” rezultoi me numër shasie të fshirë dhe targa të vjedhura në Tiranë. Ende s’ka persona të vënë në pranga lidhur me këtë ngjarje.
Edhe mbrëmjen e djeshme, sipas hetimeve parapake, dyshohet se Diego Haxhiraj alias Teki Haxhiraj alias Diego Hanaj, mendonte se mjeti me të cilin lëviznin efektivët ishte i personave që do ti bënin atentatit.
Sipas policisë, 38-vjeçari ka qëlluar me armë ndaj automjetit tip “Audi” me të cilin lëviznin dy efektivët jashtë shërbimit. Kjo ngre dyshime se Diego Haxhiraj lëvizte i armatosur pasi i trembej një atentati.
