Mbledhja e sotme e kryesisë së Partisë Demokratike ka nxjerrë edhe drejtuesit e “Grupeve të Punës” me detyrë të drejtojnë dhe ndjekin në bazë aksionin politik të Partisë Demokratike.
Kështu, në qarkun Kukës drejtues do të jetë Isuf Çela, në Dibër Xhelal Mziu, në Shkodër Bardh Spahia, Jozefina Topalli në Lezhë dhe Oerd Bylykbashi në Durrës.
Tomorr Alizoti do të jetë drejtuesi i Qarkut Berat, Luçiano Boçi i Elbasanit dhe Edmond Spaho i Korçës. Në Fier, është caktuar Luan Baçi, në Vlorë Bujar Leskaj dhe në Gjirokastër Tritan Shehu.
Qarku Tiranë është ndarë në 5 zona: Zona 1 – Kryetar Grupi Edi Paloka dhe përfshin degët 1, 2, 3, 4; Zona 2 – Kryetar Grupi Agron Shehaj dhe përfshin degët 5,7,12; Zona 3 – Kryetar Grupi Belind Këlliçi dhe përfshin degët 6,13,14,15,16 ; Zona 4 – Kryetare Grupi Albana Vokshi dhe përfshin deget 8, 9,10,11; Zona 5 – Kryetar Grupi Flamur Noka dhe përfshin degët, Kamëz, Paskuqan, Vorë, Kavajë dhe Rrogozhinë.
Para mbledhjes, kryetari i PD-së Sali Berisha mbajti një fjalim për mediat.
“Pakënaqësia dhe urrejtja ndaj këtij regjimi po bëhet gjithnjë e më e papërmbajtur, gjithnjë e më e madhe. Kjo është plotësisht e ligjshme, sepse çdo ditë e më e papërmbajtur bëhet makineria e vjedhjes dhe e plaçkitjes nga regjimi me në krye Edi Ramën i qytetarëve shqiptarë“, tha Berisha mes të tjerash.
